PDM bekommerd oor kiesstelsel
Die Popular Movement for Democracy (PDM) het heelwat planne wat vanjaar tot uitvoer gebring moet word.
Jemima Beukes
Die Popular Movement for Democracy (PDM) wil verseker dat die 2019-verkiesing vir ‘n president en lede van die Nasionale Vergadering (NV) vry en regverdig verloop.
Om hierdie rede wil die party ‘n afspraak met die Verkiesingskommissie van Namibië (ECN) belê.
Volgens die president van die party, mnr. McHenry Venaani, het die ECN met die vorige verkiesing onderneem dat elektroniese stemtoerusting in die toekoms ‘n papierrekord sal hê. Dit het volgens Venaani, wat Maandag ‘n nuuskonferensie in Windhoek toegespreek het, nooit gebeur nie.
Hy het die ECN ook daarvan beskuldig dat dit “wanordelike” verkiesings aanbied, wat meebring dat mense vir twee dae in rye moet staan en steeds nie in staat is om te stem nie.
“Ons het nog nooit ‘n akkurate kieserslys gehad nie. Ons wil seker maak hierdie foute word reggestel. Ons wil graag om ‘n tafel met die ECN sit en bespreek hoe om struikelblokke vir geloofwaardige verkiesings uit die weg te ruim,” het Venaani gesê.
Voorts het die PDM met ‘n omvattende hersieningsproses begin. Bestaande lede moet herregistreer deur elk N$10 te betaal.
Venaani voorsien dat die party in 2018 altesaam 200 000 lede sal registreer.
Dit bring mee dat bestaande lede nie as lede beskou sal word tot hulle herregistreer nie.
Die party sal ook wegdoen met die ou lidmaatskapstelsel. ‘n Nuwe lidmaatskapkaart, wat soos ‘n bankkaart lyk, sal ingestel word.
Hierdie veranderinge volg nadat die party verlede jaar sy handelsmerk verander het en ‘n nuwe kenteken gekry en die naam “DTA“ met “PDM” vervang het. Die partykleure is egter behou.
Volgens Venaani sal die nuwe lidmaatskaplys die leiers van die party in staat stel om ‘n doeltreffende databasis te hê en beter met partylede te kommunikeer.
“Ons sal ook ‘n inbelsentrum vir die party tot stand bring sodat ons lede regstreeks met ons kan praat,” het hy gesê.
Die PDM sal ook sy eie interne demokrasie toets deur ‘n verkiesingskongres in die tweede helfte van die jaar te hou. By die kongres sal die topses-posisies in die party gevul moet word.
Die party beoog ook om 700 nuwe takke landswyd te stig. Dit is ter voorbereiding van ‘n nuwe struktuur sodat streekskonferensies gehou kan word.
Die Popular Movement for Democracy (PDM) wil verseker dat die 2019-verkiesing vir ‘n president en lede van die Nasionale Vergadering (NV) vry en regverdig verloop.
Om hierdie rede wil die party ‘n afspraak met die Verkiesingskommissie van Namibië (ECN) belê.
Volgens die president van die party, mnr. McHenry Venaani, het die ECN met die vorige verkiesing onderneem dat elektroniese stemtoerusting in die toekoms ‘n papierrekord sal hê. Dit het volgens Venaani, wat Maandag ‘n nuuskonferensie in Windhoek toegespreek het, nooit gebeur nie.
Hy het die ECN ook daarvan beskuldig dat dit “wanordelike” verkiesings aanbied, wat meebring dat mense vir twee dae in rye moet staan en steeds nie in staat is om te stem nie.
“Ons het nog nooit ‘n akkurate kieserslys gehad nie. Ons wil seker maak hierdie foute word reggestel. Ons wil graag om ‘n tafel met die ECN sit en bespreek hoe om struikelblokke vir geloofwaardige verkiesings uit die weg te ruim,” het Venaani gesê.
Voorts het die PDM met ‘n omvattende hersieningsproses begin. Bestaande lede moet herregistreer deur elk N$10 te betaal.
Venaani voorsien dat die party in 2018 altesaam 200 000 lede sal registreer.
Dit bring mee dat bestaande lede nie as lede beskou sal word tot hulle herregistreer nie.
Die party sal ook wegdoen met die ou lidmaatskapstelsel. ‘n Nuwe lidmaatskapkaart, wat soos ‘n bankkaart lyk, sal ingestel word.
Hierdie veranderinge volg nadat die party verlede jaar sy handelsmerk verander het en ‘n nuwe kenteken gekry en die naam “DTA“ met “PDM” vervang het. Die partykleure is egter behou.
Volgens Venaani sal die nuwe lidmaatskaplys die leiers van die party in staat stel om ‘n doeltreffende databasis te hê en beter met partylede te kommunikeer.
“Ons sal ook ‘n inbelsentrum vir die party tot stand bring sodat ons lede regstreeks met ons kan praat,” het hy gesê.
Die PDM sal ook sy eie interne demokrasie toets deur ‘n verkiesingskongres in die tweede helfte van die jaar te hou. By die kongres sal die topses-posisies in die party gevul moet word.
Die party beoog ook om 700 nuwe takke landswyd te stig. Dit is ter voorbereiding van ‘n nuwe struktuur sodat streekskonferensies gehou kan word.
Kommentaar
Republikein
Geen kommentaar is op hierdie artikel gelaat nie