Patrick skuif na Cornish Pirates

Andrew PoolmanDie Namibiese vaskopstut Patrick Schickerling sê hy het vertroue dat hy met sy aansluiting by Cornish Pirates meer speeltyd as tevore sal kry wanneer die Engelse rugbyseisoen volgende maand begin.Die oudskolier van Walvisbaai Privaat Hoërskool en gewese Namibiese o.20-speler is onlangs saam met vyf klubmaats deur Exeter Chiefs (kampioene van Engeland én Europa in 2019-2020) vrygestel om vir Cornish Pirates te speel. Al ses hierdie spelers bly egter by beide klubs geregistreer, met die opsie om vanuit die RFU-kampioenskap-klub nader geroep te word indien die premierligaklub so verlang.Die 22-jarige Schickerling sê: “Ons groepie 'youngsters' is vrygestel om ervaring op te bou en gereed te wees wanneer die geleentheid by Exeter hom voordoen. Ons het reeds met die voorseisoen begin; ons eerste ligawedstryd in die RFU-kampioenskap is op die naweek van 18 September (tuis, teen Richmond).“Ek sien die skuif as 'n goeie kans, want Pirates het baie goeie afrigters vir hul skrum en lynstaandrywe en dis presies wat ek nodig het. Ons behoort ook nou 'n volle seisoen te kan speel, so ek sal hopelik meer speeltyd kry.”Schickerling was in die vorige seisoen reeds aan Cornish Pirates uitgeleen en het dus reeds blootstelling aan dié groep gekry. Hy is wel net een keer ingespan, toe hy op 29 Mei vanjaar in die laaste ligawedstryd teen Jersey Reds in die beginspan was. Hy het 63 minute gespeel en het die kans aangegryp om 'n drie te druk toe hy van agter 'n losskrum naby die doellyn opgetel en oorgedryf het.“Dit was moeilik om 'n plek in die span oop te speel met hulle ervare vaskopstutte, maar ek het my voet nou in die deur gesit met die laaste wedstryd, so ek is gereed en opgewonde oor die nuwe vol seisoen,” sê hy.Die beweeglike vaskop van 120 kg, wat nog nie sy vuurdoop in toetsrugby gekry het nie, het onlangs reeds verklaar dat hy met graagte uitsien om nader geroep te word wanneer Namibië vir sy aanslag op kwalifisering vir die 2023 Wêreldbeker in Frankryk begin.Die Vrystaat Cheetahs se Aranos Coetzee (33), wat in die vorige twee Wêreldbekers gespeel het, behoort steeds in die binnebaan te wees wanneer afrigter Allister Coetzee volgende jaar sy Namibiese span vir die kwalifiserende toernooi teen Afrika-opposisie saamstel.Die Noordwes-Luiperds en Pukke se Nelius Theron, asook AJ de Klerk (FNB Wanderers) was in 2019 die ander twee vaskoppe wat vir die Namibiese span na die 2019 Wêreldbeker in Japan gekies is.Schickerling het oor twee jare uithalerspel gelewer vir Namibië se span wat in die Wêreldrugby Onder 20 Trofee-toernooie (Montevideo 2017 en Boekarest 2018) meegeding en beide kere vierde klaargemaak het. Ná afloop van laasgenoemde toernooi in Roemenië het die rugbywebblad Rugbypass vir Schickerling begin uitsonder as een van die spelers wat die sterkste na vore getree en groot belofte vir die toekoms getoon het.– andrew@republikein.com.na

Patrick skuif na Cornish Pirates

Kommentaar

Republikein 2025-12-18

Meld asseblief aan om kommentaar te lewer

Patrick skuif na Cornish Pirates

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.