Passasiers glo gestrand na botsing

Tanja Bause'n Bus van Bailey's Reo Liner was op Sondag 16 April buite Klawer in Suid-Afrika op die N7-hoofroete van Kaapstad af na Namibië in 'n ongeluk met 'n sedanvoertuig betrokke. Sewe van die agt familielede in die sedanvoertuig het op die toneel gesterf, terwyl die agtste een op pad na die Vredenburg-hospitaal oorlede is. Volgens Netwerk24 het die sedanvoertuig 'n ander voertuig probeer verbysteek en trompop met die aankomende bus gebots. Niemand in die bus is beseer nie.“Met die wysheid, krag en vaardigheid wat God die busbestuurder, mnr. Gerson Imbili, op daardie oomblik gegee het, kon Gerson die bus tot stilstand bring en ons ongedeerd daarvan afkom. Ons was almal geweldig getraumatiseerd. Dit was een van die mees afskuwelike ongelukke wat ek nog in my lewe gesien het,” het 'n vroulike passasier wat op die bus was, gesê. Volgens haar is Bailey's Transport onmiddellik van die ongeluk in kennis gestel. Die busbestuurder het nie genoeg geld by hom gehad om die 27 passasiers oornag in die omgewing te akkommodeer nie. “Die bestuur het geen simpatie met die bestuurder getoon nie, hulle was net bekommerd oor die bus. Gerson het pas 27 mense se lewens gered. Hy was onder geweldige spanning omdat die polisie daarop aangedring het dat hy die bus van die ongelukstoneel verwyder,” het die passasier gesê.Baileys Transport het 'n bus uit Windhoek gestuur wat eers die dag daarná die passasiers verder kon vervoer.Volgens haar het ds. Koordom van die VGK-kerk tot die passasiers se redding gekom. Hy het hulle van kos en koffie voorsien en almal na die kerk geneem. Die passasiers het geld bymekaar gemaak om met die onkoste te help. Koordom het slaapplek vir almal gereël. Hy het ook gereël dat die bus van die ongelukstoneel verwyder word. Volgens die passasier het die maatskappy Maandag, toe die bus uit Windhoek by hulle aangekom het, vir die passasiers kos gekoop.“Intussen het passasiers op Springbok gewag wat nie een keer deur Baileys gekontak is met 'n verduideliking nie. Telefoonoproepe na die kantoor in Windhoek het onbeantwoord gebly,” het sy gesê.“Net ná die ongeluk gebeur het, is ek in kennis gestel,” het me. Yolande Alwyn, die bestuurder van Bailey's Reo Liner se kantoor in Kaapstad gesê. Volgens haar het sy onmiddellik begin om alternatiewe vervoer vir die passasiers te probeer reël. “Die een maatskappy kon die passasiers terug Kaapstad toe vervoer en die ander maatskappy kon hulle net tot op die grens vervoer omdat hulle nie gemagtig is om oor die grens te ry nie. Dit is hoekom ons besluit het om 'n bus uit Windhoek te stuur om die mense te vervoer,” het sy gesê. “Ek het vir die assistentbestuurder, André van Wyk, lugtyd gestuur sodat ons in kontak kan bly. Hy het my verseker dat niemand op die bus beseer is nie en my ook ingelig dat Koordom die mense by die kerk versorg. Ek het gevra of ek vir verblyf op Klawer moet reël, maar André het my verseker dat alles onder beheer is en dat dit nie nodig is nie,” het sy bygevoeg. “Ek het ook intussen kontak met die dominee gemaak en hy sal vir al sy onkoste vergoed word.”

Passasiers glo gestrand na botsing

Kommentaar

Republikein 2025-06-09

Meld asseblief aan om kommentaar te lewer

Passasiers glo gestrand na botsing

Kommentaar

Republikein 2025-06-09

Meld asseblief aan om kommentaar te lewer

MELD AAN

Advertensie