Pas maar op vir dié prutpot

Minette Brink - Anderdag pak ek vir ’n slag kaste reg en kom op ’n stapel handleidings van elektroniese toebehore af. Hoekom ek die goed hou, weet niemand. Ek weet hoe werk ’n ketel, ’n strykyster, ’n yskas en dies meer. Tyd vir wegsmyt. Ek blaai vinnig deur elkeen en loer hier en daar vir ’n versteekte waarborg of kwitansie, net in geval. En daar kom ek af op inligting wat my hele dag omdop – in die prutpot oftewel “slow cooker” se handleiding. En nou moet lesers asseblief die baie “Engels” verskoon."Welcome to buy this product,“ sê die boekie. "This product has excellent design and attractive appearance.” Ek drentel na die kombuiskas toe en maak die deure oop. Vir lank staan en bekyk ek die ovaal, silwer bedryf van ’n kant af. Nee, ek sien niks asemrowend aan die ding se ontwerp nie, maar nou ja. Ek lees verder.“It throws off the life artistic inspiration everywhere.” Nadat ek die sin drie keer gelees het, haal ek die pot uit die kas en plaas dit in ’n estetiese posisie in die middel van my werkstafel. Nou weet ek hoekom die Muse my deesdae ontwyk – oor die pot wat op die verkeerde plek was.Diep opgewonde, met ’n reusebeker koffie in die hand, skrop ek nes op die rusbank en blaai bewerig van afwagting om. “It uses china inside element to ensure sanitation.” Dit het ’n wyle geduur om uit te vind wat presies die Oosterse binne-element is wat sulke uitstekende higiëne bied, maar danksy die prentjies kon ek mettertyd agterkom dis die porseleinbak wat in die silwer bedryf pas. Ek is in my element.“Especially nutrition that is not easy to destroy.” Uiteindelik. ’n Wapen waarmee daardie hardnekkige voedingswaarde finaal vernietig kan word. My ou Superpot . . . Maar toe begin ruk die riglyne handuit. “Please do not lay the cooker on the carpet.” En vir wat nie? Ons, net soos almal wat ons ken, maak dan net op die sitkamermat kos. “Do not lay aboard the lid, china inside element and stainless steel crust when in use.” Maar jy kan maar opklim as hy af is? En wat is ’n “vlekvrye staalkors”? Koshuis-pastei?“Don’t use the water or rigid goods to wash the products.” So geen water en regop of stram goed naby die pot nie. Nou maar reg so, hoor.“Wash the china inside element twice and swing out the water remnants.” Teen die tyd trek my kiewe styf van kannie-ve’stanie. “If you wash with water it will bring security hidden trouble.” Wat? Gaan die geheime potpolisie in die nag toeslaan?“Please keep the cooker away from children in order to avoid that children are smashed by it.”“Bly in jou kamer!” gil ek vir my kind. “Hierdie ding het ’n lewe van sy eie en sy teiken is kinders!” Sy loer om die sitkamerdeur en skud dan net haar kop. “This appliance is not intended for use by persons (including children).”Die pot is terug in die kas. Ek soek nou die handleiding vir die drukkoker.

Pas maar op vir dié prutpot

Kommentaar

Republikein 2025-12-19

Meld asseblief aan om kommentaar te lewer

Pas maar op vir dié prutpot

Kommentaar

Republikein 2025-12-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.