Pas jou rug op

Tanja Bause - Môre word Wêreldruggraatdag met die tema “Wees lief vir jou ruggraat” gevier.

Lede van die Namibiese Chiropraktisynsvereniging en van hul pasiënte het in Zoo Park in Windhoek bymekaargekom om die “Straighten Up”-oefenprogram vir ’n reguit ruggraat te doen om bewustheid vir dié dag te skep.

Mense van oraloor die wêreld kom jaarliks op 16 Oktober bymekaar om bewustheid van ruggraatsiektes of -afwykings te skep.

Miljoene mense wêreldwyd ly aan ruggraatsiektes of -afwykings.

Dít sluit laerugpyn, nekpyn, skoliose en werwelsiektes in.

Spinale pyn en gestremdheid kan verreikende gevolge vir 'n individu se algemene gesondheid hê, en selfs voorkom dat hulle kan werk of aan daaglikse aktiwiteite kan deelneem.

Die “Straighten Up”-program behels ’n paar eenvoudige oefeninge en leefstylaanbevelings wat slegs ’n paar minute per dag neem om te voltooi.

Dit bevorder ’n beter postuur en stabilisering van die liggaam se kernspiere, wat rugprobleme help voorkom.