Republikein Newspaper

Die diskwalifikasie van Botswana, Comores, Eswatini en Zimbabwe van die 2020 Cosafa seuns onder 17 sokkertoernooi vanweë hul insluiting van spelers ouer as wat toegelaat word, het wysigings genoodsaak in die toernoio wat nou Sondag in Port Elizabeth, Suid-Afrika, sal begin.
Die Konfederasie van Afrika-sokker (CAF) se komitee vir jeugkompetisies het beslis die vier spanne is geskors uit die kwalifiserende streektoernooi vir die volgende Afrika Nasiesbeker (aangebied in Marokko in middel 2021).
Elk van die lande het minstens een speler gehad wat in hul magnetiese weerklankbeeldtoets (MRI-skandering) gefaal het wat voor die toernooi in die gasheerland uitgevoer is.
Die toernooi se regulasies hieromtrent is duidelik:
“8.5 ’n Toets vir spelers se kiesbaarheid op grond van hul ouderdom is verpligtend en sal uitgevoer word op alle spelers by aankoms in die gasheerstad. Die toetse word by CAF se mediese sentrum uitgevoer met gebruik van MRI-skanderingsapparaat. Die koste van die toetse word deur CAF gedra.
“8.6 In die geval waar ’n deelnemende span een of meer spelers oplewer wat nie die MRI-toets vir kiesbaarheid slaag nie, sal die betrokke span gediskwalifiseer word en so vroeg as prakties moontlik huiswaarts terugkeer.”
MRI-skanderings word oor die wêreld heen gebruik om vas te stel of spelers jong genoeg vir ouderdomskompetisies (vernaam o.17) is.
Dokters kyk na die vergroeiing van gebeente in die menslike gewrig, wat hoogs onwaarskynlik is om voor die ouderdom van 17 jaar te gebeur. Die akkuraatheid van die toetsing word op meer as 99% gestel. Wanneer die vergroeide been op die MRI-skandering te sien is, dien dit as bewys dat die speler ouer as 17 jaar is.
Botswana, Comores, Eswatini en Zimbabwe se straf is dat hulle buite rekening vir die volgende twee o.17 Afrika Nasiebekertoernooie sal bly en dus ook geen kans op deelname aan die volgende Fifa o.17 Wêreldbeker sal hê nie.
Die 2020 Cosafa seuns o.17-kampioenskap begin nou Sondag met vier oorblywende spanne, wat sake op ’n rondomtaliegrondslag sal uitspook. Twee spanne vorder na die finaal op 29 November.
Suid-Afrika, as gasheerspan open nou sy toernooi teen Malawi. Die openingswedstryd sal vroeër tussen Angola en Zambië wees.
– Cosafa.com