Republikein Newspaper

Denver Kisting – Die leier van die Popular Democratic Movement (PDM), mnr. McHenry Venaani, het gistermiddag gesê die amptelike opposisie gaan appelleer teen ’n kieshofuitspraak.

Kragtens dié bevinding moet die PDM vier ingesweerde LP’s vervang met vier ander vanweë ’n geskil oor die party se lys van kandidate vir die Nasionale Vergadering (NV).

Venaani sê gister se uitspraak laat nie geregtigheid geskied aan regsreëls nie. “Die uitspraak het ’n aantal foute.”

Derhalwe gaan hulle hul tot die hooggeregshof wend, sê hy.

Hul appèl gaan geskoei wees daarop dat ’n wet nie verhewe bo die Grondwet kan wees nie.

“’n Leier kan nie gekies word op grond van ’n tegniese punt nie.”

Hy sê tot die appèl afgehandel is, sal hulle nie die kieshof se bevinding uitvoer om vier van hul LP’s met vier ander te vervang nie.

Die opposisieleier het ook die tydsberekening van gister se hofuitspraak bevraagteken. Syns insiens is dit ’n polities gedrewe uitspraak om aandag af te lei van die ontvouende Fishrot-sage. “Ek is nie verantwoordbaar aan howe nie – ek is verantwoordbaar aan die mense wat vir die PDM gestem het.”

Sou die hooggeregshof uiteindelik ook nie in hul guns beslis nie, sal hulle dié uitspraak eerbiedig, sê hy.

Agtergrond

Venaani het vroeër by navraag gesê sommige lede van sy party probeer hul weg parlement toe stoomroller.

Dít het gekom nadat vier PDM-lede die party en die Verkiesingskommissie van Namibië (ECN) hof toe gesleep het.

In ’n brief gedateer 6 Februarie 2020 het die Windhoekse prokureur mnr. Norman Tjombe namens die vier gegriefde partye, me. Charmaine Tjirare, mnr. Hidipo Hamata, me. Yvette Araes en mnr. Max Katjimune, aan die hoofkiesbeampte van die ECN, mnr. Theo Mujoro, hul griewe gelug.

Tjombe het gesê sy kliënte se name is voor verlede jaar se nasionale verkiesings aan die ECN voorgelê vir oorweging om as kandidate vir die NV te staan.

Volgens die prokureur was die viertal onderskeidelik in posisies 12, 13, 14 en 17 op die PDM se parlementslys.

Die party het in die NV-verkiesing op 27 November 16,65% van die stemme op hom verenig wat ’n totaal van 16 setels beteken.

Tjombe het vroeër gesê mnr. Reggie Diergaardt, wat die party onsuksesvol in die tussenverkiesing in die Khomasdal-kiesafdeling verteenwoordig het, was in die 15de posisie, maar het ná verlede jaar se verkiesing bedank.

Dít het meegebring dat die vier ongelukkige lede almal vir ’n stoel in die NV in aanmerking gekom het omdat elkeen een plek opgeskuif het weens Diergaardt se bedanking.

Die prokureur sê die lede moes sedertdien tot hul skok van ’n ander lys kennis neem.

Hy het onder meer gevra dat die nasionale kiesliggaam die NV-aankondiging wat PDM-lede betref, opskort tot die geskil besleg is.

Adv. Notemba Tjipueja, voorsitter van die ECN, het teen gistermiddag nog nie op navrae oor die hofuitspraak kommentaar gelewer nie.

- [email protected]