Parlement hervat môre

Denver Kisting – Wanneer die Nasionale Vergadering (NV) môremiddag sy werksaamhede hervat, sal dit onder streng voorwaardes geskied wat ten doel het om die verdere verspreiding van Covid-19 in Namibië hok te slaan.

So sê mnr. David Nahogandja, die woordvoerder van die NV.

Om te voldoen aan die vereiste wat met die handhawing van sosiale afstand verband hou, sal slegs 50 LP’s binne die Huis toegelaat word, sê hy.

Ander lede van die Huis sal in ander konferensievertrekke gehuisves word, sê hy. Dié vertrekke sal via telekonferensie met die Huis verbind word.

Alle ander riglyne sal eerbiedig word, sê Nahogandja. Dit sluit die was van hande en die lees van liggaamstemperatuur in.
Hy het voorts gesê die hooffokus tydens dié sessie sal die bespreking van die nasionale begroting wees.

Mnr. Ipumbu Shiimi, die minister van finansies, sal na verwagting Woensdagmiddag die begroting ter tafel lê.

Volgens Nahogandja sal pres. Hage Geingob op 4 Junie die staatsrede in die NV lewer.

[email protected]