Pandemiemaatreëls hou hepatitis E in toom

Jana-Mari Smith – Drie jaar nadat hepatitis E in Namibië uitgebreek het en waaraan tientalle mense dood is, het die reaksie op die Covid-19-pandemie gehelp om nuwe infeksies en sterftes in informele nedersettings te bekamp.Vyf hepatitis E-sterftes is verlede jaar aangemeld en tot dusver in 2021 nog nie een nie.Daarteenoor is 55 mense tussen Desember 2017 en September 2018 weens dié virusinfeksie dood.“Daar is 'n opmerklike afwaartse neiging in die aantal hepatitis E-gevalle gedurende die afgelope twee maande,” het die ministerie van gesondheid en maatskaplike dienste se jongste verslag bevestig.Die verslag dui aan hoewel die nasionale reaksieprogram om die uitbreking onder beheer te bring weens Covid-19 afgeskaal is, die gesondheidsministerie 'n skenking van N$4 miljoen van die Japannese ambassade deur die Wêreldgesondheidsorganisasie (WHO) ontvang het om dié program te versterk.Meer as 'n halfmiljoen mense is deur maatskaplike mobiliseringsprogramme vir hepatitis E bereik, lui die verslag.Met finansiering van die Japannese ambassade het die Verenigde Nasies se Ontwikkelingsprogram (UNDP) en die Development Workshop of Namibia (DWN) suksesvolle gemeenskapsgeleide sanitasieprogramme van stapel gestuur om die gesondheid en higiëne in informele woonbuurte te verbeter. Die bou van 40 demonstrasietoilette in geteikende gebiede het bygedra dat gemeenskappe meer as 400 toilette gebou het in stedelike gebiede wat beperkte dienste ontvang.Die DWN en ander betrokke partye het met die installasie van duisende tippy tap-handewaspunte – in reaksie op Covid-19 – die toegang tot handewasgeriewe drasties verbeter op plekke waar sanitasiegeriewe skaars is. BEDUIDENDE AFNAMEOor die algemeen is “'n beduidende afname in die aantal gevalle en sterftes aangemeld”, volgens die verslag.Slegs een nuwe infeksie is tussen 11 en 24 Januarie 2021 aangemeld, teenoor agt vanaf 28 Desember 2020 tot 10 Januarie 2021.Dié geval is in die Otjozondjupastreek geregistreer en geen ander streke het nuwe gevalle gehad nie.Altesaam 26 nuwe gevalle is tussen 30 Desember 2020 en 24 Januarie 2021 in die Khomas-, Erongo-, Otjozondjupa-, Omusati- en Oshikotostreek aangemeld.Die verslag bevestig hepatitis E is 'n siekte wat veral die inwoners van informele nedersettings teiken, omdat die “toegang tot skoon drinkwater, sanitasie en higiëne beperk is”.In totaal is 8 045 gevalle sedert die aanvang van die uitbreking tot 24 Januarie vanjaar aangemeld.Tussen Maart 2020, toe die eerste Covid-19-gevalle in Namibië aangemeld is, en Januarie vanjaar het hepatitis E-gevalle met 588 toegeneem.Dit, teenoor die toename van meer as 3 000 gevalle wat tussen Oktober 2018 en 1 Desember 2019 aangemeld is. Dit het van 3 859 tot 6 904 gespring.Vanaf Januarie 2018, toe infeksies op 294 gevalle gestaan het, het getalle teen Desember 2018 tot 3 859 geklim.In 2019 het infeksies met meer as 2 100 nuwe gevalle toegeneem, vanaf 4 227 in Januarie 2019 tot 6 407 in September 2019.Tussen Oktober 2018 en Augustus 2019 het sterftes vanaf 31 tot 55 toegeneem.– jana@namibiansun.com

Pandemiemaatreëls hou hepatitis E in toom

Kommentaar

Republikein 2026-07-06

Meld asseblief aan om kommentaar te lewer

Pandemiemaatreëls hou hepatitis E in toom

Kommentaar

Republikein 2026-07-06

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.