Pandemie verpletter lewens
Jo-Maré Duddy – Minstens vier uit elke tien Namibiërs is hul permanente werk, besigheid of inkomste weens Covid-19 kwyt en meer as ses uit elke tien mense moet soms hongerly.
Sowat 65% van Namibiërs wat aan 'n Afrobarometer-opname oor Covid-19 deelgeneem het, se huishoudelike inkomste het vanweë die pandemie aansienlik getuimel.
Survey Warehouse, samesteller van dié telefoniese opname met 1 200 mense oraloor die land, se bevindinge is gister vrygestel.
Dit toon 23% van respondente was dikwels of heeltyd sonder enige kontantinkomste gestrand. Sowat 29% moes telkemale sonder geld klaarkom en 17% een of twee keer.
Bykans die helfte het hul werk, besigheid of inkomste tydelik verloor.
Nege present was dikwels of altyd honger, terwyl 27% verskeie kere nie genoeg kos gehad het nie. Sowat 26% het gesê dit was een of twee keer die geval.
Net tussen 31% en 39% van respondente is geensins deur enige van bogenoemde beproewinge gelouter nie.
AGTERUITGANG
Gemeet aan die toegang tot kontant, voedsel, water, kookolie en mediese sorg, is armoede in die land nou so erg soos voor die draai van die eeu, sê mnr. Christie Keulder, 'n politieke wetenskaplike van Survey Warehouse.
“Ons is besig om na 1999-vlakke terug te gly,” aldus Keulder. Volgens hom het dié agteruitgang egter reeds in 2014 begin. Die pandemie kon die situasie selfs tydelik verbeter het, meen Keulder. Sommige mense het ekstra water, kos en 'n eenmalige kontanttoelaag van die regering ontvang, banke kon skuldvakansies toestaan en mediese geriewe is opgerig – vergunnings wat voorheen nie geredelik beskikbaar was nie.
Sowat 73% van mense moes nietemin tydens die pandemie op hulp van hul familie of vriende staatmaak.
Hoewel 56% meen die regering het die ekonomie baie of redelik goed tydens die krisis bestuur, is 94% bekommerd oor die negatiewe uitwerking wat die pandemie daarop gaan hê. Sowat 92% is bekommerd oor die uitwerking wat dit op hul huishoudelike ekonomie gaan hê.
Ondanks die skadelike uitwerking wat die staat van inperking en aandklokreël op die ekonomie en mense se bestaan het, meen 89% van respondente dit was en is noodsaaklik. – Bykomende beriggewing deur Jana-Mari Smith
Sowat 65% van Namibiërs wat aan 'n Afrobarometer-opname oor Covid-19 deelgeneem het, se huishoudelike inkomste het vanweë die pandemie aansienlik getuimel.
Survey Warehouse, samesteller van dié telefoniese opname met 1 200 mense oraloor die land, se bevindinge is gister vrygestel.
Dit toon 23% van respondente was dikwels of heeltyd sonder enige kontantinkomste gestrand. Sowat 29% moes telkemale sonder geld klaarkom en 17% een of twee keer.
Bykans die helfte het hul werk, besigheid of inkomste tydelik verloor.
Nege present was dikwels of altyd honger, terwyl 27% verskeie kere nie genoeg kos gehad het nie. Sowat 26% het gesê dit was een of twee keer die geval.
Net tussen 31% en 39% van respondente is geensins deur enige van bogenoemde beproewinge gelouter nie.
AGTERUITGANG
Gemeet aan die toegang tot kontant, voedsel, water, kookolie en mediese sorg, is armoede in die land nou so erg soos voor die draai van die eeu, sê mnr. Christie Keulder, 'n politieke wetenskaplike van Survey Warehouse.
“Ons is besig om na 1999-vlakke terug te gly,” aldus Keulder. Volgens hom het dié agteruitgang egter reeds in 2014 begin. Die pandemie kon die situasie selfs tydelik verbeter het, meen Keulder. Sommige mense het ekstra water, kos en 'n eenmalige kontanttoelaag van die regering ontvang, banke kon skuldvakansies toestaan en mediese geriewe is opgerig – vergunnings wat voorheen nie geredelik beskikbaar was nie.
Sowat 73% van mense moes nietemin tydens die pandemie op hulp van hul familie of vriende staatmaak.
Hoewel 56% meen die regering het die ekonomie baie of redelik goed tydens die krisis bestuur, is 94% bekommerd oor die negatiewe uitwerking wat die pandemie daarop gaan hê. Sowat 92% is bekommerd oor die uitwerking wat dit op hul huishoudelike ekonomie gaan hê.
Ondanks die skadelike uitwerking wat die staat van inperking en aandklokreël op die ekonomie en mense se bestaan het, meen 89% van respondente dit was en is noodsaaklik. – Bykomende beriggewing deur Jana-Mari Smith
Kommentaar
Republikein
Geen kommentaar is op hierdie artikel gelaat nie