Pandemie knak vrywilligertoerisme

Francoise Steynberg - Die impak van die Covid-19-pandemie op vrywillige werker-toerisme (voluntourism) is geweldig. Die toerismebedryf is geknak en kry tans geen inkomste uit internasionale vrywillige werker-toeriste nie en veral bewaringsprojekte trek aan die kortste ent. Vier bewaringsorganisasies waar vrywilligers werk, het aan Republikein gesê die gebrek aan internasionale vrywilligers het 'n verwoestende impak op hul bewaringsprojekte.Volgens die Cheetah Conservation Fund (CCF) naby Otjiwarongo het vrywillige werkers verlede jaar US$202 735 uit hul totale toerisme-inkomste van US$834 735 bygedra. "Gelukkig het CCF voldoende personeel om ons 40 jagluiperds te voer, versorg en te laat oefen. Ons doen sake soos gewoonlik, buiten vir die toeriste," het me. Susan Yannetti, senior adviseur vir strategiese inisiatiewe van CCF, gesê. Sy sê buiten die jagluiperds, sien die personeel ook om na honderde vee op hul plaas. Die uitvoerende hoof van die N/a'an ku sê-stigting, dr. Rudie van Vuuren, het bevestig Covid-19 het 'n geweldige impak op N/a'an ku sê en dié bedryf. "Die N/a'an ku sê-stigting ondersteun jaarliks ongeveer N$8 miljoen se bewarings- en humanitêre projekte. Dit sluit in die werk met die San-gemeenskap by Pos 3 Epukiro waar N/a'an ku sê se Lifeline-kliniek is, die Clever Cubs-skool en sowat 85 kinders wat op N/a'an ku sê bly en in Windhoek skoolgaan," sê Van Vuuren. BEWARINGSWERKDie bewaringswerk sluit in die vinnige reaksie op mens-dier-konflik, navorsing en diererehabilitasie op N/a'an ku sê. "Die diere wat op N/a'an ku sê is, is daar oor mens-dier-konflik en nie uit vrye wil of ons keuse nie. Hierdie diere moet na omgesien word en die werk met betrekking tot mens-dier-konflik moet op ’n deurlopende basis plaasvind. "Internasionale vrywillige werker-toerisme finansier saam met ons ander toerisme van Kanaan, Neuras, Utopia en N/a'an ku sê Lodge die groot meederheid van die kostes verbonde aan die N/a'an ku sê-stigting," verduidelik Van Vuuren. "Die grootste impak is die algehele verwoesting van dié toerisme en dat die stigting alternatiewe bronne van inkomste moet vind.” Van Vuuren sê alhoewel 12 vrywilligers, wat gedurende die inperking "nie anders kon as om op N/a'an ku sê te bly nie, kon ons nie normale fooie vir hul verblyf vra nie". Die bemarkingsbestuurder van die Harnas Wildlewe-stigting, me. Waldene Grove, het gesê sedert Maart was die totale verlies van inkomste uit toerisme geweldig gewees. "Dit het 'n verwoestende impak op die finansies van Harnas, want ons het die inkomste nodig om meer as 100 karnivore en 120 primate te voer en rehabiliteer, asook ander kleiner diere soos meerkatte, jakkalse, voëls, katte en honde," het sy gesê.400 DIERE OP HARNASSy sê Harnas het byna 400 diere en sonder die inkomste is dit onmoontlik om oor 'n lang tydperk na hulle om te sien. "Dit eindig nie hier nie. Die situasie het 'n rimpeleffek op ons ander besighede soos akkommodasie, toergidse en -operateurs, agentskappe en voertuigverhuringsmaatskappye," sê Grove. Volgens haar kry Harnas sowat 40 vrywilligers per maand met 'n totaal van sowat 460 per jaar. "Teen die huidige koers met slegs besprekings vir 2021, beteken dit ons kyk na 'n moontlike verlies van 80% van ons inkomste. Vir nou kan ons slegs op 20% tot 25% van die Namibiese mark staatmaak, sê Grove. "Agt vrywilligers het verkies om nie terug te gaan Europa toe nie en besluit Harnas is veiliger. Die werk op die plaas word nou deur die personeel en met behulp van dié agt gedoen," het Grove gesê. Van die vrywilligers glo om in Namibië met sy sonskyn en lae bevolkingsyfer te bly, is hulle kanse skraler om nie met Covid-19 geïnfekteer te word nie. Mnr. Riaan van Zyl, hoofbestuurder van Okutala Etosha Lodge, sê die vrywilligers het daagliks gehelp om kos vir die diere voor te berei, die diere gevoer en die kampe van die diere skoongemaak. "'n Groot persentasie van die inkomste van vrywillige werker-toeriste is deur die lodge gebruik om die personeel – van gidse tot personeel wat na die diere omsien en in die kombuis werk – te betaal. "Dit is nou 'n swaar las op ons voltydse veearts en diereversorgers wat nou die daaglikse take van die vrywilligers moet doen," het Van Zyl gesê. Okutala Etosha Lodge het sowat 70 tot 80 vrywillige werkers per jaar gekry, "maar baie van hulle het teruggekeer, selfs ses keer". Volgens Van Zyl het die sewe vrywilligers op die lodge ná die inperking na Europa en hul families teruggekeer. - francoise@republikein.com.na

Pandemie knak vrywilligertoerisme

Kommentaar

Republikein 2026-08-04

Meld asseblief aan om kommentaar te lewer

Pandemie knak vrywilligertoerisme

Kommentaar

Republikein 2026-08-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.