Padongelukke vier hoogty

Verskeie passasiers en voetgangers is die afgelope naweek in padongelukke dood of beseer. • Die 62-jarige mnr. Charlie du Toit het in die Walvisbaai-staatshospitaal aan beserings beswyk nadat hy glo Saterdag omstreeks 13:45 by die aansluiting tussen Moses Garoeb- en Hanna Mupetamistraat deur ’n 28-jarige vrou sonder ’n rybewys raakgery is. Die verdagte het van die ongelukstoneel gevlug en is later die dag in hegtenis geneem toe sy by die Welwitschia Private Hospitaal vir mediese behandeling aangemeld het. Me. Jeronette Benson, vrou van die Walvisbaaise stedelike kiesafdeling se raadslid mnr. Deriou Benson, het Maandag in die landdroshof verskyn op klagte van strafbare manslag, die bestuur sonder ’n geldige rybewys en ontvlugting van die ongelukstoneel sonder om aan beserings of skade aandag te gee. Sy sou na verwagting Maandag ’n formele aansoek om borgtog ingedien het.• ’n Nege-en-twintigjarige man word van strafbare manslag en bestuur onder die invloed van alkohol of dwelms aangekla nadat hy Vrydagaand omstreeks elfuur ’n vrou in Robert Mugaberylaan in Klein Windhoek doodgery het. Die slagoffer, wat as me. Namwandi Ruusa Elizabeth (33) geïdentifiseer is, is op slag dood. Na bewering het die oorledene ten tyde van die voorval saam met haar vriend die pad probeer oorsteek. • ’n Sewejarige meisie het frakture aan haar regterbeen opgedoen nadat sy glo deur ’n 33-jarige vrou raakgery is. Die slagoffer het glo as voetganger die hoofpad tussen Rundu en Nkurenkuru oorgesteek, toe sy Vrydag omstreeks 13:30 in die dorp Mukekete getref is. Sy word tans in die Rundu-staatshospitaal behandel.• ’n Man word onder meer van strafbare manslag en roekelose en nalatige bestuur aangekla nadat hy Vrydagaand omstreeks 20:30 in ’n botsing op die pad tussen Grootfontein en Tsumeb betrokke was. Die persoon in die ander voertuig, wat as me. Horases Derseline (34) geïdentifiseer is, is op die toneel dood nadat die voertuig waarin sy gery het, reg van voor teen ’n sedanvoertuig gebots het. Die bestuurder van die sedanvoertuig met ’n sleepwa waarop houtskool vervoer is, het na bewering nie ’n rybewys gehad nie. • ’n Saak van roekelose en nalatige bestuur word ondersoek ná ’n 45-jarige man Saterdag omstreeks 18:00 twee voertuie en ’n voetganger langs die pad gestamp nadat hy glo beheer oor sy voertuig verloor het. Die ongeluk het op die pad tussen Ondangwa en Oluno plaasgevind. Die bestuurder is ook ernstig in die ongeluk beseer. Die voetganger is in ’n kritieke toestand en word tans in die hospitaal behandel.• ’n Saak van roekelose en nalatige bestuur word ondersoek nadat ’n 22-jarige manlike bestuurder en sewe passasiers ernstige beserings opgedoen het toe die bestuurder glo beheer oor sy voertuig verloor het. Die ongeluk het omstreeks halfeen (00:26) Saterdagoggend in Moses Tjitenderostraat in die Nau-Aib-woonbuurt op Okahandja plaasgevind. Al die beseerdes is volgens die polisie se misdaadverslag vir die naweek na die Okahandja-staatshospitaal vir behandeling geneem. Die verslag verstrek nie besonderhede oor die soort voertuig en of dit moontlik oorlaai was nie.• ’n Saak van strafbare manslag word ondersoek nadat ’n 52-jarige manlike bestuurder dood is en twee passasiers ligte beserings opgedoen het toe die voertuig waarin hulle gereis het, omgeslaan het. Die ongeluk het die naweek op die pad tussen Okahandja en Ovitoto, ongeveer 30 km buite Okahandja, plaasgevind. Die bestuurder, mnr. Frederich Kauatjitotje, het glo beheer oor die voertuig verloor en aan sy beserings beswyk. Die oorledene se naasbestaandes is ingelig.• Mnr. Shihepo Teofelus Hilifa is Sondagoggend omstreeks 02:00 op die toneel dood nadat die voertuig waarin hy ’n passasier was glo teen ’n boom gebots het. Die bestuurder het glo op die grondpad tussen Omatando en Ongwediva beheer oor die voertuig verloor. ’n Saak van strafbare manslag is aanhangig gemaak.– republikein@republikein.com.naFOTODie 28-jarige me. Jeronette Benson van Walvisbaai staan tereg op klagte wat met ’n tref-en-trapongeluk verband hou. Foto Facebook

Padongelukke vier hoogty

Kommentaar

Republikein 2026-02-03

Meld asseblief aan om kommentaar te lewer

Padongelukke vier hoogty

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.