Paaieowerheid hof toe gesleep oor slaggat

Jana-Mari Smith – Mnr. Angaleni Asipala eis N$165 612 in skadevergoeding weens die Paaieowerheid (RA) se nalatigheid om die C44-Tsumkwe-grondpad behoorlik in stand te hou en hul versuim om motoriste teen slaggate te waarsku. Dít nadat sy Toyota Fortuner verlede jaar afgeskryf is toe hy 'n slaggat getref het. Asipala beweer sy voertuig is só erg beskadig dat dit vir skrootmetaal verkoop moes word, nadat hy op 3 Augustus 2020 op pad na Maroelaboom in die Otjozondjupastreek die slaggat getref het.Hy eis vergoeding vir die geld wat hy verloor het nadat sy motor vir skrootmetaal vir 'n bedrag minder as die motor se boekwaarde voor die ongeluk verkoop is.Hy sê die motor, 'n 2021-model, is voor die ongeluk teen N$229 650 gewaardeer. Hy kon die beskadigde voertuig teen N$76 038 vir skrootmetaal verkoop, en eis dat die RA die verskil plus die insleepkoste van N$12 000 aan hom terugbetaal.In sy hofdokumente, wat in Februarie vanjaar ingedien is, sê Asipala die ongeluk is “uitsluitlik deur die nalatigheid van die paaieowerheid veroorsaak”, wat verantwoordelik is vir die instandhouding van nasionale paaie.Die RA het die beskadigde padoppervlak nie in stand gehou of herstel nie, en het versuim om die padoppervlak gereeld na te gaan vir slaggate of moontlike tekens van agteruitgang, voer hy aan.Asipala het verder benadruk die RA “het nie die nodige waarskuwingstekens aangebring om motoriste oor die slaggate te waarsku nie”, en dat hulle nie hul plig teenoor die algemene publiek nagekom het om skade te voorkom of om motoriste in te lig oor die moontlike gevare van die toestand van die pad nie.In 2020 het Nampa berig padgebruikers in die Otjozondjudastreek het 'n beroep op die RA gedoen om die C44, 'n 246 kilometer-grondpad wat vanaf Grootfontein tot by Rundu strek en in Tsumkwe eindig, te herstel en op te gradeer. Die RA ontken enige aanspreeklikheid, en voer aan Asipala moet die oorsaak van die ongeluk voor die hof bewys.Hulle voer verder aan dat die voorval deur die eiser se “eie nalatigheid” veroorsaak is. Volgens die RA het hy waarskynlik nie die pad behoorlik dopgehou nie en “nie 'n matige en redelike spoed onder die omstandighede gehandhaaf nie”.Die RA sê verder hulle kom hul pligte ten opsigte van nasionale padnetwerke na.Ná 'n saakbestuurskonferensie wat vandeesweek gehou is, het hoërhofregter Eileen Rakow die saak tot 1 Junie vir 'n statusverhoor uitgestel.Mnr. Samuel Philander van LorentzAngula Inc. is Asipala se regsverteenwoordiger, terwyl die RA deur mnr. Dirk Conradie, 'n staatsadvokaat van Conradie & Damaseb Legal Practitioners, verteenwoordig word.– republikein@republikein.com.na

Paaieowerheid hof toe gesleep oor slaggat

Kommentaar

Republikein 2025-12-16

Meld asseblief aan om kommentaar te lewer

Paaieowerheid hof toe gesleep oor slaggat

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.