Paaie saai verwoesting oor afgelope Kersnaweek

Augetto Graig - Terwyl Namibiërs familie en vakansiebestemmings probeer bereik, plaas die land se onveilige paaie 'n demper op baie se vreugde. Die Namibiese polisie het amptelik verslag gedoen oor talle ongelukke wat families in die feestyd in rou gedompel het in plaas van vreugde.Volgens mnr. Sidney Boois van die Motorvoertuigongelukfonds (MVAF) was daar tussen 22 en 26 Desember vanjaar 68 ongelukke landswyd, waarin 13 mense oorlede is en 130 beseer. Dit vergelyk goed met 2016 toe 89 ongelukke in dié tyd gelei het tot 24 sterftes en 174 beserings. Op Oidimba naby Eenhana was 'n 26-jarige bestuurder verlede Vrydag van Eenhana af op pad na Omundaungilo toe sy Toyota-bakkie glo mnr. Lazarus Mwatwange van Ongaiva op Okongo gestamp het. Mwatwange het gesterf en die polisie ondersoek die saak.Saterdag het 'n soortgelyke voorval naby Oshakati op die pad naby die NamWaterdam plaasgevind. Die 27-jarige bestuurder van 'n Toyota Land Cruiser het na bewering 'n 27-jarige voetganger, mnr. Albert Natangwe, gestamp. Natangwe het later aan sy wonde beswyk. Die bestuurder was na bewering onder die invloed van drank. Op dieselfde dag het die 25-jarige bestuurder van 'n blou sedan om 06:26 op die C34-pad tussen Walvisbaai en Swakopmund agter Duin 7 glo beheer oor die voertuig verloor. Die motor het omgeslaan en een passasier, die 28-jarige me. Latoka Albertina Gabriel, het op die toneel gesterf. 'n Vroulike bestuurder (23) is op Hoachanas by die hoofhek van die Game On Bar tussen middernag en eenuur Saterdagoggend in hegtenis geneem. Sy is daarvan beskuldig dat sy 'n voetganger gestamp en beseer het. Sy beskik glo nie oor 'n geldige rybewys nie. Die polisieondersoek duur voort. Die 63-jarige bestuurder van 'n Mercedes Benz het die afgelope Saterdag teen skemer op Ondangwa se hoofpad naby die KAYEC-sentrum glo met 'n Volkswagen-sedan gebots. Die bestuurder van die sedan en 'n passasier is in die ongeluk beseer. Saterdagmiddag het 'n voertuig op Gibeon deur die draadheining van 'n huis in die Frank Basson-afdeling gebars en in die huis se muur vasgery. Die huis is ernstig beskadig. Die 37-jarige bestuurder het van die toneel gevlug, maar is later in hegtenis geneem. Die ondersoek duur voort. Sondag is 'n voetganger vyfuur die oggend by die Sauyemwa-nedersetting op Rundu dood ná hy raakgery is. Die polisie sê die 28-jarige mnr. Kamburu Frans het op die sypaadjie gesit toe 'n Toyota-bakkie met verpersoonlikte nommerplate hom gestamp het. Die bestuurder het weggejaag. Frans het op pad hospitaal toe gesterf. Niemand is al in hegtenis geneem nie, maar die polisieondersoek duur voort. In die hoofstad se Otjomuise-woonbuurt was daar om tienuur die aand voor Kersfees 'n ongeluk op die David Hosea Meroro-pad naby Rocky Crest. Die bestuurder van 'n Toyota het glo beheer oor die voertuig verloor en die motor het omgeslaan. Mnr. Nanghonga Letu was nie in besit van 'n geldige rybewys nie en hy is op slag dood. Die ander insittendes in die voertuig is beseer en vir behandeling hospitaal toe geneem. Die liggaam van 'n onbekende man is by Mpoto op die B10-pad tussen Rundu en Okongo gevind. Hy is na bewering deur 'n onbekende voertuig gestamp. Die polisie versoek enigiemand met inligting oor die voorval om in verbinding met hulle te tree.Mense in dié omgewing wat 'n familielid vermis, word versoek om die polisielykshuis in die omgewing te besoek.'n Inwoner (28) van Ongulayanetanga naby Onethindi, op die pad tussen Ondangwa en Omuthiya, is omstreeks 22:55 op Kersaand gestamp. Hy het na bewering die pad oorgesteek toe hy deur 'n onbekende voertuig getref is. Hy is vir behandeling na die Onandjokwe-hospitaal geneem en verkeer in 'n stabiele toestand.Die 37-jarige bestuurder van 'n Iveco-bussie het die oggend ná Kersfees omstreeks 06:10 beheer oor die voertuig verloor. Die ongeluk het by die Shipepe-nedersetting langs die hoofpad tussen Ongwediva en Ondangwa plaasgevind. Van die 23 passasiers in die bussie is twee ernstig beseer, terwyl die res ligte beserings opgedoen het. Almal is vir behandeling na die Oshakati-staatshospitaal geneem.

Paaie saai verwoesting oor afgelope Kersnaweek

Kommentaar

Republikein 2026-08-03

Meld asseblief aan om kommentaar te lewer

Paaie saai verwoesting oor afgelope Kersnaweek

Kommentaar

Republikein 2026-08-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.