Paaie eis 22 lewens

Agt ongelukke in minder as ’n week

20 March 2019 | Ongelukke
Verdana" >

Elvira Hattingh – Sedert Donderdag is agt padongelukke landswyd aangemeld, waarin 22 mense dood en 27 beseer is.

Volgens ‘n verslag wat gister deur die Namibiese polisie (Nampol) vrygestel is, is altesaam 13 mense dood in ’n ongeluk wat Sondag omstreeks 15:00 sowat 3 km buite Otavi plaasgevind het, terwyl 18 passasiers beseer is.

Hieronder tel vyf kinders.

Tydens die ongeluk was twee Iveco-passasierbussies op die B1-pad na Tsumeb in ‘n kop-aan-kop-botsing betrokke.

Die een bussie was van die Noorde af op pad en die ander van die Suide af.

Beide voertuie het aan die brand geslaan en heeltemal uitgebrand.

Die slagoffers, waaronder agt vroulik en vyf manlik, het onherkenbaar verkool, terwyl die beseerdes na hospitale op Otavi, Otjiwarongo en Grootfontein geneem is.

Die polisieondersoek duur voort om die oorsaak van die ongeluk te bepaal.

Die polisie sê die oorledenes sal na Windhoek geneem word vir DNS-toetse en hul families word gevra om die lykshuis vir hierdie doel te kontak, of hoofinsp. Oscar Shatipamba by 081 311 4842.

Nóg ’n ongeluk, wat nie in die polisieverslag vermeld is nie, maar in sosiale media gedeel is, het glo Donderdag op die pad tussen Grootfontein en Tsumeb plaasgevind.

Drie mense het na wat verneem word tydens dié voorval gesterf.

Vrydag omstreeks 12:00 het ‘n Fransman in die Etosha Nasionale Park op die Okaumweo-grondpad, sowat 40 km buite Onamutoni, beheer oor ‘n stasiewa verloor.

Die motor, waarin vyf passasiers gereis het, het gerol.

‘n Franse vrou (51) is op die toneel dood en ‘n 60-jarige passasier is ernstig beseer.

Die ander passasiers het geringe beserings opgedoen en is na die Lombard-hospitaal op Tsumeb geneem.

Die bestuurder van ‘n bakkie, mnr. Pandu Nangolo, het Saterdag omstreeks 18:00 by Epalala Oshanyata gesterf ná hy, volgens die polisie, met ‘n hoë spoed teen ‘n huis se grensmuur vasgery het. Vier passasiers is ernstig beseer en na die Engela-streekhospitaal geneem.

Naby Rehoboth het ‘n 48-jarige polisieman, mnr. Louis van Wyk, Saterdag op die Bahnoff-Uhlenhorst-grondpad glo beheer oor sy bakkie verloor.

Die bakkie het die pad sowat 3 km voor Bahnhof verlaat en gerol. Van Wyk het op die toneel aan sy beserings beswyk, terwyl ‘n vroulike passasier ernstig beseer en na die St. Mary-hospitaal geneem is.

Saterdag is ‘n tref-en-trap voorval aangemeld ná mnr. Kaumbangere Mureko (31) se lyk omstreeks 03:00 langs die Werda-Omakange-pad naby die Okonyota-nedersetting gevind is.

Die polisie vermoed hy is raakgery toe hy die pad wou oorsteek. ’n Onbekende bestuurder het weggejaag.

Enigiemand met meer inligting oor die voorval, kan hoofinsp. Paavo Iyambo by 081 649 9249 kontak.

Op Walvisbaai het mnr. Johannes Andimba (48) Saterdag glo beheer oor sy bakkie in Vyfde Straat verloor en teen die muur naby Namport se suidelike hek vasgery.

Hy het op die toneel aan sy beserings beswyk en was alleen in die motor.

Nog ‘n man, mnr. Sam Tobias (26), het die afgelope Sondag omstreeks 03:00 in Windhoek in Auasweg, Suiderhof verongeluk.

Hy het glo beheer oor sy motor verloor en dit het gerol. Hy is op slag dood.

“Die hartseer werklikheid is dat motorbestuurders 99% van die kere vir ongelukke verantwoordelik is. Nampol en ander belangegroepe veg voortdurend dat mense hul gedrag moet verander, maar daar kom skynbaar dadels van.

“As ons nie ernstig daaraan werk om ons gedrag op die paaie te verander nie, sal baie mense sterf. Ons doen ‘n beroep op alle bestuurders om die regte ding te doen en geduld aan die dag te lê sodat ons lewens op die paaie kan red,” het Nampol se woordvoerder, hoofinsp. Kauna Shikwambi, in die verslag gesê.

Soortgelyk

 

KOLLIG Voorblad

1 dag gelede | Byvoegsels

Swakop hou Makietie bl. 4

ECN gaan Itula se aansoek teenstaan

1 dag gelede | Politiek

Denver Kisting – Vanweë die beweerde negatiewe uitwerking van elektroniese stemtoestelle (EVM’s) in die afgelope presidensiële verkiesing moet die proses tersyde gestel word.Dr. Panduleni Itula,...

Ekonomie bloei lánkal

1 dag gelede | Plaaslik

Jo-Maré Duddy – Ekonomiese groei het reeds in 2015 skerp begin tuimel sonder dat dit deur amptelike syfers weerspieël is, toon nuwe data wat gister...

NOU AAN DIE GANG

1 dag gelede | Byvoegsels

» Die Swakopmund Wetenskaplike Vereniging bied tans ‘n Kersfees-skattejag by die Swakopmund Museum aan. Dit bestaan uit twee afdelings, een vir kinders en een vir...

Geskorste raadslede van Rehoboth herkies

1 dag gelede | Regering

Denver Kisting op Rehoboth – Dieselfde span raadslede wat verlede jaar deur dr. Peya Mushelenga, die minister van stedelike en landelike ontwikkeling, in die pad...

Weer vir 13 Desember 2019

1 dag gelede | Weer

BINNELAND: Mooi weer en baie tot bloedig warm in die Suide. Elders sal dit gedeeltelik bewolk en baie tot bloedig warm wees. Winderige weer sal...

STEMFEITE: NAM & SA 2019

1 dag gelede | Politiek

In Namibië het Swapo persentasiegewys meer steun ingeboet as die ANC in Suid-Afrika.

NamibRe: Versekeraars moet 12,5% sedeer

1 dag gelede | Howe

Elvira Hattingh Plaaslike versekeringsmaatskappye móét voorts vir herverseke­ring by NamibRe opdok - tot tyd en wyl daar in 'n hangende hofsaak oor die wettigheid van...

CoW baklei teen beslaglegging

1 dag gelede | Regering

Denver Kisting – Die Windhoekse munisipaliteit (CoW) baklei tans verbete teen ’n beweerde beslagleggingsbevel wat poog om van hul vaste bates te konfiskeer.Veertien superintendente verbonde...