Pa ry eenjarige dood

’n Angolese burger het volgens die polisie se misdaadverslag Vrydag omstreeks 01:00 in ’n tienjarige meisie se slaapkamer gegaan en haar verkrag terwyl sy geslaap het.

Die meisie het glo wakker geword en haar ouma vertel wat gebeur het. Die man is ’n huishulp in die huis waar die meisie woon. Die man het op die vlug geslaan. Die voorval het in die Onambiya-nedersetting by Okongo plaasgevind.

’n Weerligstraal het Vrydag vir Mbilisu Kasiku (44) in die Kwaki-nedersetting naby Nkurenkuru doodgeslaan. Sy was na bewering besig om buite – agter haar slaapkamer – te bad toe die weerlig haar getref het.

ONGELUKKE

’n Trein het Saterdag ’n man (24) op Tses doodgery. Die voorval het tussen 03:00 en 04:00 op die treinspoor in die Growerand- informele nedersetting gebeur. Volgens die misdaadverslag was die slagoffer saam met vriende toe hy hulle verlaat het om te gaan slaap.

Twee leerlinge van die Gekombineerde Skool Karasburg is Vrydag omstreeks 17:00 op die C10 sowat 16 kilometer voor Ai-Ais in ’n ongeluk dood. Hulle was onderskeidelik 12 en 21 jaar oud. Die 38-jarige bestuurder het na bewering beheer oor die voertuig verloor en dit het omgeslaan. Nog vier leerlinge van onderskeidelik 13, 15, 16 en 19 is in die ongeluk beseer.

’n Pa het sy eenjarige dogter omgery terwyl hy agteruit gery het. Sy is na die kliniek gehaas waar sy dood verklaar is. Die ongeluk het Saterdag om 15:26 in Tsintsabis gebeur.

’n Man (61) is in hegtenis geneem nadat hy Vrydag omstreeks 17:17 na bewering ’n elfjarige seun op Khorixas doodgery het. Die seun wou oor die pad loop. Hy is na die staatshospitaal op Khorixas geneem en is daarna na Windhoek oorgeplaas, maar hy het op pad na Windhoek gesterf. Die bestuurder was glo ten tyde van die ongeluk onder die invloed van drank.

ROOF

’n Onbekende aantal verdagtes het Saterdag omstreeks 01:00 in Perlhuhnstraat in Hochland Park oor ’n grensmuur en elektriese heining geklim en toegang tot ’n huis verkry. Die verdagtes het glo deur ’n glasdeur op die slagoffer geskiet. Die slagoffer het gemaak of hy dood is. Die verdagtes het items ter waarde van N$26 000 gesteel. Patroondoppie is op die toneel gevind.

Vrydag omstreeks 11:44 het ’n onbekende man ’n 54-jarige man van sy rugsak met N$50 000 kontant in beroof. Na bewering het die man die kontant by Bank Windhoek in die hoofstad getrek en die geld in sy rugsak gesit terwyl hy nog in die bank was. Hy het na Bauer’s Auto Werkstatt toe gery en terwyl hy sy voertuig geparkeer het, het ’n onbekende man uit ’n rooi Polo geklim. Hy het die slagoffer met ’n mes gedreig en sy rugsak gegryp en weggery. Niemand is nog hegtenis geneem nie.

Twee onbekende verdagtes het Vrydag omstreeks 19:00 ’n 40-jarige taxibestuurder in die Oshaakondwa-nedersetting gestop en gesê hulle wil na die Punyu-nedersetting geneem word. Toe hulle die Punyu-nedersetting nader, het hulle die man aan sy nek gegryp en hom met ’n vuurwapen gedreig. Die verdagtes het sy hande vasgebind, sy gesig met ’n T-hemp bedek en hom in die voertuig se kattebak gedwing. Hulle het na die Iindjinda-nedersetting – sowat sewe kilometer van Ondangwa af – gery en hom uit die kattebak gehaal. Die verdagtes het sy voertuig uitmekaargebou en die onderdele in ’n ander voertuig gelaai. Onderdele ter waarde van N$12 500 is gesteel. Sy persoonlike dokumente, N$800 in kontant en sy selfoon is ook gebuit.