Outjo vier 120ste bestaansjaar

Meer as 1 000 Outjo-inwoners het Vrydag by die Etoshapoort-stadion vergader om hul dorp se 120-jarige bestaansjaar te vier.Namibië se visepresident, mnr. Nangolo Mbumba, het die vieringe bygewoon. Hy het gesê volgens die geskiedenis was Charles John Anderson in 1859 die eerste Europese setlaar op Outjo. Met sy aankoms het hy San-, Damara- en Herero-mense teëgekom wat as nomadiese jagters en versamelaars hier gewoon het. "Hulle het hierdie plek Otjoho, Otjo en later Outjo genoem, wat beteken ‘'n plek op die rotse’ of ‘klein heuwels’ en wat verwys na die dorp se topografie,” het Mbumba gesê.Hy het verder gesê Duitsers het hulself tussen 1895 en 1898 op Outjo gevestig en 'n groot bergvesting naby die westelike oewer van die Outjo-rivier vir hul troepe opgerig. Dit was die eerste permanente struktuur op Outjo.‘n Waterskaarste het groot probleme in die 1900's veroorsaak toe die bevolking toegeneem het. Die Duitsers het toe 'n put in die rivier gegrawe waar hulle 'n toring gebou het wat vandag nog 'n nasionale monument is.Die Outjo-munisipaliteit verskaf vandag nog water vanuit sommige van die boorgate wat deur die Duitse magte geboor is.Die Etoshapoort-deel van die dorp is in 1906 gestig, met sewe klein besighede en 'n bevolking van 237 inwoners, het Mbumba gesê.'n Kerkgebou is in 1910 vir Rynse sendelinge gebou, gevolg deur 'n skool in 1921.Outjo het in 1925 'n dorpsraad gekry, wat later op 1 April 1944 na 'n munisipaliteit bevorder is. Eerwaarde Paulus / Goagoseb was Outjo se eerste swart burgemeester in 1992.“Ons wy hierdie 120 jaar toe aan dié wat hul lewens opgeoffer het om hierdie land te bevry,” het Mbumba gesê.Hy het dorpsleiers en inwoners, waarvan daar al meer as 12 000 is, aangemoedig om die dorp verder te ontwikkel deur rassisme, seksisme en alle onwenslike gedrag te vermy. Mbumba het Outjo sukses daarmee toegewens om in die volgende 120 jaar ‘n groot stad te word. (Nampa)

Outjo vier 120ste bestaansjaar

Kommentaar

Republikein 2025-07-16

Meld asseblief aan om kommentaar te lewer

Outjo vier 120ste bestaansjaar

Kommentaar

Republikein 2025-07-16

Meld asseblief aan om kommentaar te lewer

MELD AAN

Advertensie