Outjo-inwoner skuldig aan dubbelmoord

Jacqueline Louw – Die man wat vier jaar gelede van die moord op sy meisie en haar seuntjie beskuldig is, is verlede week in Windhoek se hoërhof daaraan skuldig bevind. Regter Naomi Shivute het die 43-jarige Sageus Somaeb skuldig bevind aan dié twee moorde nadat sy bevind het die enigste redelike afleiding wat uit die omstandigheidsgetuienis gemaak kan word, is dat hy die sesjarige Remember Gaingob in 2013 op Outjo vermoor het.Somaeb is aan die begin van sy verhoor skuldig bevind aan die eerste klag van moord waarop hy tereggestaan het toe hy erken het hy het sy meisie, me. Charlote Gaingos, in ’n mesaanval in Julie 2013 doodgemaak. Tydens die aanval het hy haar 21 keer met ’n mes gesteek.Regter Shivute het Somaeb verlede Woensdag ook skuldig bevind aan aanranding met die doel om ernstige liggaamlike skade te berokken, wat spruit uit ’n aanval op Gaingos in Februarie of Maart 2013, asook op ’n klag van dwarsboming van die gereg.Die regter het bevind Somaeb het teenstrydige weergawes oor Remember se dood aan die polisie gegee in ’n poging om die ondersoek na die kind se dood te belemmer.Somaeb het ook tereggestaan op ’n tweede klag van aanranding waarin hy daarvan beskuldig is dat hy vir Remember in Mei 2009 met ’n stuk draad geslaan het.Regter Shivute het Somaeb vrygespreek op hierdie klag omdat daar nie enige mediese getuienis was om Remember se beserings te staaf nie. Volgens getuienis wat gedurende die hofsaak gelewer is, was die kind se voete geswel en het hy merke op sy lyf gehad.Regter Shivute het in haar uitspraak genoem die dokter wat die nadoodse ondersoek op Remember gedoen het, het tot die slotsom gekom hy is verwurg. Sy het ook opgemerk Remember en sy jonger suster was alleen die nag toe hy vermoor is.Omdat Somaeb die enigste volwassene in die huis was en daar geen getuienis is dat iemand anders toegang tot die huis gehad het nie, kan die afleiding gemaak word dat Somaeb vir die kind se dood verantwoordelik was, het die regter in haar uitspraak gesê.Somaeb sal op 24 November vir die voorvonnisverhoor in die hof verskyn.Staatsadvokaat Simba Nduna tree namens die staat op, terwyl mnr. Johan van Vuuren Somaeb verteenwoordig.

Outjo-inwoner skuldig aan dubbelmoord

Kommentaar

Republikein 2026-04-22

Meld asseblief aan om kommentaar te lewer

Outjo-inwoner skuldig aan dubbelmoord

Kommentaar

Republikein 2026-04-22

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.