Outjo Bakkery kook

Ronelle Rademeyer - As die kuiery hierdie naweek by die Wildsfees bietjie wild raak, kan jy altyd die volgende oggend jou babelaas by Outjo Bakkery kom laaf met ’n bord spek en eiers.

Want hierdie bakkery met sy groot kuierstoep, is dié plek as jy geselskap soek en lekker wil eet en kuier.

Eienaars André en Tana Burger sorg hier vir die smullekker fyngebak en heerlike maaltye. Die pasteie, vertel André, is veral ‘n treffer. Dit is dikwels sommer vroeg in die dag al uitverkoop.

Die Burgers, albei bekendes in natuurbewaringskringe, het die nuut-opgeknapte bakkery in Augustus verlede jaar gekoop.

Dit is nie net die locals wat hier uithang nie. Toerbusse vol toeriste op pad na die Etosha Nasionale Park, stop ook hier om bene te rek en iets te eet.

André sê vanjaar het die seisoen besonder vroeg begin. “Dit is besiger as ander jare dié tyd. Ons kon dit agter aan die hoeveelheid busse en toeriste in huurvoertuie wat op die stop.”

Die Burgers bied ook wynproe-aande aan wat baie gewild is.