Ousus S'mores is 'n yster

Tanja Bause - S’mores, die hond wat ’n waentjie trek waarin die Yorkie Nugget sit, is glad nie ’n vreemde gesig by die Otjihase-myn buite Windhoek nie. Volgens S’mores se eienaar, mnr. Kobus Maritz, kry sy oefening wanneer sy die wa trek en Nugget maak van die saamrygeleentheid gebruik. “In Januarie 2019 het ons ’n nuwe hond gesoek. Ek het vir S’mores by die Dierebeskermingsvereniging (DBV) in Windhoek gesien. Toe ek wegstap het sy met my begin ‘praat’. Sy het nie geblaf nie, sy het met my gesels op daardie manier wat honde met ’n mens kommunikeer. Ek het omgedraai en daar en dan besluit die hond kom saam met my huis toe,” het hy gesê. S’mores was omtrent 18 maande oud en sy het ses daarvan by die DBV deurgebring.“Sy is ’n baie besige hond en ‘n hond met haar eie wil, maar tog so ’n bondeltjie liefde.”Maritz het gevra watter tipe hond sy is en die antwoord was dat sy vermoedelik ’n bloedhond-kruising is. Hy het op die internet begin navorsing doen en op die Facebook-blad Treeding Walker - Coon Hound Companions afgekom.“Die Redtick Coon Hound lyk die naaste aan haar en S’mores het al die eienskappe wat hulle beskryf. Ek het ook mettertyd sulke honde agter op bakkies gesien. Hulle word hoofsaaklik as jaghonde gebruik en nie as troeteldiere nie.” Alhoewel S’mores baie stap en Maritz haar veld toe vat sodat sy spoor kan volg, het sy nie genoeg oefening gekry nie.“Ek is te oud om saam met haar te hardloop. Sy word ook nie fisiek uitgeput wanneer sy net spoor volg nie, maar dit laat haar brein oefen. Ek moes ’n plan maak dat sy meer oefening kry.”Hy het ’n waentjie uit ou yster vir haar gebou. “Sy het vinnig by die waentjie aangepas. Die waentjie moet nog verbeter word, maar vir nou is ons al twee gelukkig. Dit is iets anders vir haar as om net te loop én sy kry die nodige oefening.”Met die hoktyd het Maritz kruideniersware via die internet bestel en in die stad gaan haal. “Ons tuinier en huishulp het nie die geleentheid om stad toe te gaan nie. Ons het toe ‘n paar items bymekaargesit en by hulle gaan aflewer. Ons het nie ’n voertuig gebruik om die goedjies te gaan afgee nie, S’mores het dit vir hulle gevat.”Daar waar ousus S’mores gaan, gaan die twee Yorkies Nugget en Ferdinand.“Nugget sal vinnig op die waentjie spring en van die gratis saamrygeleentheid gebruik maak.” - tanja@republikein.com.na

Ousus S'mores is 'n yster

Kommentaar

Republikein 2026-07-27

Meld asseblief aan om kommentaar te lewer

Ousus S'mores is 'n yster

Kommentaar

Republikein 2026-07-27

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.