Ouma Selma se genesende hande

Tanja Bause – In ’n sinkhuis in Okuryangava aan die buitewyke van Windhoek sit ’n ouma en masseer ’n twee maande oue baba, terwyl sy hom saggies stories in Nama vertel.Ouma Selma Garases is ’n smeer-ouma wat glo sy is met dié gawe gebore.“Ek is al ouer as 60 en van kleins af kon ek mense smeer,” sê sy. Ouma is op ’n plaas in die Okahandja-omgewing gebore. Sy het daar grootgeword, maar nooit skoolgegaan nie. Haar ma was ook ’n smeervrou, wat agtergekom het Ouma het dié gawe, en haar touwys gemaak het.“Toe ek baie jonk was, het ek my ma gesmeer as sy moeg was of nie lekker gevoel het nie. Ek het met haar begin en meer en meer mense het deur die jare na my toe gekom om gesmeer te word. Hulle het ook hul babas na my toe begin bring sodat ek hulle kan smeer.”Ouma het ná die geboorte van haar tweede kind op soek na werk Windhoek toe getrek. “In Windhoek het ek vir baie jare by verskillende mense huiswerk gedoen, maar ek het nog altyd mense gesmeer.”Ouma smeer babas, swanger vroue, siek mense, mense met gestremdhede en vroue wat moeilik swanger raak.“Een vrou wat hier naby woon, het ’n paar jaar gelede na my toe gekom en gesê sy sukkel om swanger te raak. Ek het haar vier keer gesmeer, en vandag het sy twee pragtige dogters. Dit maak my hart baie bly as ek hoor die vroue het nou babas, en as ek die kinders in die straat sien rondloop.”Ouma Selma sê sy het ook ’n onderwyseres van Khorixas gesmeer, wat nou ’n baba het.Tans smeer sy vier kinders en drie volwassenes met gestremdhede.“Ek smeer hulle om hul bloedtoevoer te verbeter en om hulle los te maak. Baie van die mense kan nou al baie meer beweeg en selfs loop,” sê sy. Ouma Selma besoek ook mense in die hospitaal om hulle te smeer. “Ek het my neef, wat in die intensiewesorgeenheid was, elke dag gesmeer. Hy het meningitis gehad en was aan masjiene gekoppel. Sy linkerkant was verlam en hy kon baie moeilik praat. Ná hy uit die hospitaal ontslaan is, kan hy werk en praat soos voorheen. Hy is ’n bouer en gaan met sy lewe aan,” sê sy. Ouma meng self die salf wat sy gebruik om mense mee te smeer. “Ek koop die bestanddele en meng die salf volgens my eie resep, wat ek oor die jare heen ontwikkel het. Kinders en swanger vroue word met een soort salf gesmeer. Mense met gestremdhede en vroue wat sukkel om swanger te word, met ’n ander salf. Vir hulle meng ek ’n baie sterker salf.”Ouma gaan daagliks na iemand se huis toe om te smeer.“Ek smeer mense hier in die nedersetting, op die dorp en in die hospitaal. Ek is baie besig omdat smeervroue deesdae baie skaars is. Jong mense stel nie meer daarin belang nie.”Ouma se suster en haar een dogter is ook smeervroue en woon op Outjo. “Wanneer ’n nuwe persoon na my toe kom dat ek hulle moet smeer, kyk ek eers na hulle en praat met hulle om uit te vind wat presies die probleem is. Dan begin ek by die probleem smeer en vandaar beweeg ek oor die hele liggaam.”Volgens Ouma Selma kan ’n smeersessie van 30 minute tot twee ure duur. “Ek is baie dankbaar vir die Here dat hy my die gawe van smeer gegee het. Ek kan mense help en dit maak my gelukkig.” - tanja@republikein.com.na

Ouma Selma se genesende hande

Kommentaar

Republikein 2026-02-03

Meld asseblief aan om kommentaar te lewer

Ouma Selma se genesende hande

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.