Ouers verloor N$240 000 op oorsese netbaltoer

Ronelle Rademeyer – Die ouers van drie jong netbalspelers van Windhoek wat sowat N$250 000 betaal het om aan ’n internasionale uitnodigingstoernooi in die Amerikaanse staat Florida deel te neem, gaan strafregtelike stappe doen teen die plaaslike toerorganiseerder wat na bewering hul geld vir ander doeleindes gebruik het.

Dit volg nadat hulle reeds agt maande sukkel om hul geld terug te kry.

Me. Melanie du Plessis sê mnr. Renfred Muller van Christian Sport Promoters “het nie eens N$1” bestee om reëlings vir die netbaltoer te tref wat van 6-14 April vanjaar sou plaasvind nie.

Muller het na bewering op 12 September verlede jaar aan haar, me. Nadia Cilliers en me. Linda Horn ’n uitnodiging gerig om hul kinders in te skryf vir ’n internasionale o.14-netbaltoernooi in Miami, Florida.

“Dit lyk asof hy ouers genader het wie se dogters tot die o.13 nasionale netbalspan of die Khomasspan verkies is,” sê Du Plessis. Volgens haar moes hulle die volgende dag ’n deposito van N$10 000 betaal om die kinders se plek in die span te verseker.

Sy sê op 29 September verlede jaar het hulle ’n kwotasie van Muller ontvang waarin hy die totale koste uitgestip het. Daarvolgens sou dit N$25 000 per kind kos en ’n verdere N$25 000 vir elke ouer, broer of suster wat saam op die toer sou gaan.

Die Du Plessis- en Cilliers-ouerpare het onderskeidelik N$75 435 en N$112 125 aan hom oorbetaal, en die Horn-gesin N$30 000 as gedeeltelik vereffening van hul toerkoste.

Dit blyk uit dokumentasie hulle het dieselfde dag ’n vals vlugbesprekingsplan ontvang. Muller kon na bewering nooit die elektroniese vliegtuigkaartjies toon om te bewys dat die vlugbesprekings wel gedoen is nie.

Du Plessis sê toe hulle by hom navraag doen oor wie almal op die toer gaan en hoe die spanlys lyk, kon hy dit nie verskaf nie.

In Februarie vanjaar het 4 Tors Inc, die organiseerders van dié internasionale uitnodigingstoernooi, aan Cilliers gesê geen inskrywingsgeld of -vorms vir ’n span uit Namibië is ontvang nie.

Vroeg in Maart het Muller nog nie eens aan die ouers gesê waar en wanneer die span sou oefen om vir die toernooi voor te berei nie. Hy kon ook nie ’n toestemmingsbrief vir die toer van die Namibiese Sportkommissie aan hulle voorlê nie.

Op 6 Maart het Cilliers vir Muller skriftelik ingelig dat hulle in die lig van die Covid-19-pandemie en die voorsiene inperkingsmaatreëls die toer kanselleer. “Aangesien geen uitgawes tot dusver deur Christian Sport Promoters aangegaan is nie, sal ons dit waardeer as ons teen 10 Maart 2020 volledig terugbetaal word,” het haar e-pos gelui.

Volgens Cilliers het sy op 16 Maart ’n vals bewys van betaling van hom ontvang.

Op 31 Mei het Muller ’n terugbetalingsooreenkoms onderteken waarin hy beloof het om die N$249 994,20 in paaiemente van N$60 000 per maand te vereffen.

Volgens Du Plessis het hy nie by dié ooreenkoms gehou nie en het hulle tot nou “nie ’n sent” van hom ontvang nie.

In ’n e-pos aan Cilliers se man, Charl, het hy laat blyk hy het hulle geld vir ander uitgawes in sy onderneming gebruik.

Muller het by navraag aan Republikein gesê hy beleef vanweë Covid-19 kontantvloeiprobleme, maar is steeds voornemens om die geld terug te betaal.

Hy sê hy het “ander ouers” se geld al terugbetaal, maar het nie gereageer op ’n versoek om bewys hiervan te lewer nie.

Volgens Du Plessis is die volgende stap om ’n klag teen Muller by die polisie in te dien.

– [email protected]