Oudit kom na spogskool se geldsake

Dani Booysen - Die moontlikheid bestaan dat beweerde finansiële ongerymdhede vir jare by Pionierspark Laerskool in Windhoek plaasgevind het.Hierdie opstopper is Woensdagaand aan ouers uitgedeel toe ‘n span van die ministerie van onderwys die skoolgemeenskap oor bevindinge van ‘n voorlopige ondersoek ingelig het.Tydens die vergadering, toegespreek deur Khomas se streekdirekteur vir onderwys, mnr. Gerard Vries, en ‘n kringinspekteur, mnr. Milton ya Otto, is gesê geen “kommissie”, toelae en “sagte lenings” mag meer betaal word nie.‘n Volskaalse oudit sal hierdie termyn oor die skool se geldsake gedoen word.Vries het die ondersoek by navraag bevestig. “Die saak moet uiters omsigtig en versigtig hanteer word omdat dit mense se werksomstandighede raak,” het hy benadruk. “Ons het ‘n skedule vir optrede voorsien en sal dit stap vir stap volg,” het die streekdirekteur gesê.“Ons tree in opdrag van die permanente sekretaris op en die oudit se doel is om klinkklare feite op die tafel te plaas. Ons sal meer terugvoering gee sodra dit moontlik is.”Ouers is ingelig dat ‘n “lywige” voorlopige verslag en aanbevelings bykomende werk verg, wat as ‘n saak van dringendheid afgehandel sal word. Die voorlopige ondersoek het in Junie plaasgevind en die oudit moet op die laatste teen November afgehandel wees.Ouers is verseker dat daar nie met die saak gesloer word nie. Die belang van versigtige en deeglike werk is egter beklemtoon.Verskeie ouers wou weet wie die verdagtes is en hoeveel geld ter sprake is. Die antwoord was dat die oudit laasgenoemde vraag moet beantwoord.Daar is benadruk dat personeelsake vertroulik is en dat geen name aan die groot klok gehang sal word nie. Ouers is verseker dat die saak op so ‘n manier behartig sal word dat die skool se beeld en reputasie beskerm sal word.Mnr. Hennie Krüger, voorsitter van die skoolraad, het ook die ondersoek en die vergadering met ouers bevestig. Hy wou nie meer besonderhede verstrek nie.“Wat belangrik is, is dat die saak sy gang gaan sonder om enige prosesse of enige persone se regte te benadeel,” het Krüger, ‘n prokureur van beroep, gesê. “Dit is belangrik dat ‘n skoolraad sy finansiële pligte streng volgens die wet uitvoer. Daar is beslis geen heksejag teen enige personeellede nie,” het hy verseker.As skoolhoof wou mnr. Ryno Brand nie kommentaar lewer nie. “Die saak is in die hande van die ministerie en as ‘n werknemer van die ministerie kan ek nie kommentaar oor ‘n hangende ondersoek lewer nie,” het hy gesê.Die skool is ook beopdrag om voortaan soos beleid voorskryf skriftelik oor alle skenkings verslag te doen. ‘n Bywoningsregister vir personeel moet ook aangehou word.Ouers moet op 19 September ‘n nuwe skoolraad verkies.Aan die positiewe kant is die skool geloof vir sy suksesse. Dit is benadruk dat niks met bykomende geldelike bydraes tot staatskole skeel nie.Die aanstelling van bykomende personeel moet egter deur die skoolraad en die ministerie goedgekeur word.Groot nadruk is geplaas op die verantwoordelike bestuur van alle skoolgelde, wat altyd tot leerlinge se voordeel aangewend moet word.‘n Nasionale afvaardiging sal Pionierspark volgende jaar besoek om uit die praktyke van hierdie modelskool te leer.

Oudit kom na spogskool se geldsake

Kommentaar

Republikein 2026-06-19

Meld asseblief aan om kommentaar te lewer

Oudit kom na spogskool se geldsake

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.