Oud-swaargewig keer op 50 terug as middelgewig

Hy was al die swaargewigbokskampioen van die wêreld en nou wil die 50-jarige Chris Byrd na die kryt terugkeer om ’n middelgewigkampioen te word.
Byrd het in 2009 laas geboks en sedertdien het hy vir jare met chroniese pyne weens verkeerde eetgewoontes gesukkel.
“My linkerbeen het in ’n stadium só gepyn, ek wou dit afsny,” het Byrd hierdie week aan World Boxing News vertel.
Volgens die Amerikaner het sy probleme jare gelede begin toe hy vir geld begin boks het.
“Niemand wou teen my in die middelgewig-afdeling (72.5 kg) boks nie, toe eet ek tot ek ’n swaargewig was,” het hy vertel.
As swaargewig het Byrd die Wêreldboksorganisasie en die Internasionale Boksfederasie se titels gewen.
Hy het eindelik 41 gevegte gewen, vyf verloor en een keer gelykop geboks.
Onder die gerekende boksers met wie hy afgereken het, tel Evander Holyfield, Vitali Klitschko, Jameel McCline en David Tua.
Die vier manne wat daarin kon slaag om hom te klop, was Wladimir Klitschko (twee keer, 2000 en 2006), Alexander Povetkin (2007), Ike Ibeabuchi (1999) en Shaun George (2008).
Teen die berugte Poolse breker Andrew Golota het hy gelykop geboks.
Volgens Byrd het hy drie jaar gelede, toe sy dogter besluit het om te trou, sy eetgewoontes drasties verander omdat hy haar die kerk wou inlei sonder om op ’n kierie te leun.
Hy het opgehou om graan en suiker en suiwelprodukte te eet en streng vegetaries geword.
Hy het ook daggaprodukte, soos olies, begin gebruik.
En nou voel hy weer jare jonger en hy is vasbeslote om – as middelgewig – ’n terugkeer tot die bokskryt te maak. – Netwerk24

FOTO’S
Só lyk die 50-jarige Chris Byrd deesdae. Foto Facebook

Chris Byrd het teen beide Klitschko-broers geboks. Hy het twee keer teen Waldimir (foto) verloor, maar het vir Vitaly gedwing om tou op te gooi. Foto AP