Oud-Namibiër wen eis teen visepresident

Henriette LamprechtOp 'n persoonlike vlak is dit die afsluiting van 'n hoofstuk. Tog gaan dit nog lank vat om heeltemal te herstel van die trauma en herinneringe wat hom teister nadat hy meer as 'n jaar in een van die mees berugte tronke in die wêreld moes deurbring. Só sê die oud-Namibiër en voormalige gevangene van die berugte Black Beach-gevangenis in Ekwatoriaal-Guinee (EG), nadat sy skadevergoedingseis teen die land se visepresident vir onregmatige aanhouding sonder verhoor geslaag het. Vir die 51-jarige Daniel Janse van Rensburg is die uitspraak bittersoet.“Geld sal nooit kan vergoed vir wat hierdie mense aan my en my gesin gedoen het nie, maar genade van Bo help.”Janse van Rensburg (51) is vir 423 dae in die Black Beach-tronk in Malabo (EG) en ook vir 126 dae in 'n huis in dieselfde stad aangehou. Hy is in Augustus 2015 uiteindelik vrygelaat. Janse van Rensburg, wat tans in Hoekwil in Suid-Afrika woon, se aanhouding het gevolg nadat 'n regter opdrag gegee het dat hy vry was om die land te verlaat. Hy is aangehou sonder dat enige aanklagte teen hom ingedien is, of dat hy verhoor of gevonnis is.Die eerste respondent in Janse van Rensburg se skadevergoedingseis van N$75 miljoen was mnr. Teodorin Nguema Obiang, tweede visepresident van die EG vir veiligheid en sekuriteit, politieke hoof en in beheer van die land se gewapende magte, polisie, tronke en aanhoudingsgeriewe. Die registrateur van akte in die Wes-Kaap was as tweede respondent gelys en het betrekking gehad op die registrasie van die akte van twee vaste bates van Obiang in die Wes-Kaap, wat deel van die eis vorm.Een van dié bates, 'n spoghuis in Clifton, Suid-Afrika, is in 2004 deur Obiang vir N$23,5 miljoen gekoop. Hierdie bate is nou deur die hof aan Janse van Rensburg toegeken. Volgens die hofstukke het Obiang erken hy het nooit in dié huis of nog 'n eiendom wat hy in dieselfde jaar in Bishop's Court vir N$26 miljoen gekoop het, tuisgegaan nie.Volgens die hofstukke is ook beslag gelê op van Obiang se bates in Amerika en Frankryk deur die betrokke lande se regerings. Ook in dié howe is sy aanspraak op diplomatieke immuniteit verwerp.In Amerika is sy herehuis in Malibu na bewering vir byna N$500 miljoen in opdrag van die hof verkoop in 'n saak wat die departement van justisie teen hom geopen het. Deel van sy skikking het ook sy versameling Michael Jackson-aandenkings ingesluit. Die Amerikaanse regering het ook beslag gelê op 'n Gulf Stream G-V Jet ter waarde van R38,5 miljoen wat deur Obiang gekoop is. In 2012 is beslag gelê op Obiang se herehuis in die Franse hoofstad Parys, en 'n internasionale lasbrief vir sy inhegtenisname is uitgereik.Janse van Rensburg is van 18 Desember 2013 tot 28 Februarie 2014 in die Black Beach-gevangenis aangehou. Hy is 'n tweede keer hier aangehou vanaf 4 Julie 2014 tot 26 Augustus 2015. In 2014 is hy tussen 28 Februarie en 4 Julie in haglike omstandighede op 'n eiendom in Malabo aangehou waar hy voortdurend dopgehou is.Hy het in 'n onderhoud met Republikein beklemtoon die uitspraak is 'n oorwinning vir hom, maar ook vir dié wat steeds deur Black Beach se mure omring word.“Dit is ook vir talle ander wat steeds hier mishandel word, wat nie in 'n posisie is om geregtigheid te kry nie; hulle deel saam met my in die oorwining,” het Janse van Rensburg gesê.Hy sê hy werk aan 'n boek oor sy ervaring. Daarin getuig hy oor dit wat God vir hom en sy gesin gedoen het.“Ek getuig waar ek genooi word om te vertel wat die Here vir my gedoen het.”

Oud-Namibiër wen eis teen visepresident

Kommentaar

Republikein 2025-11-04

Meld asseblief aan om kommentaar te lewer

Oud-Namibiër wen eis teen visepresident

Kommentaar

Republikein 2025-11-04

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.