Oud-Namibiër sleep EG hof toe
Mnr. Daniel Janse van Rensburg eis skadevergoeding van miljoene van ‘n visepresident in Sentraal-Afrika nadat hy vir 529 dae onregmatig en sonder verhoor of vonnis in die land aangehou is.
Henriette Lamprecht - Uitspraak is in die hoërhof in Kaapstad voorbehou in ‘n saak waarin ‘n voormalige gevangene van die berugte Black Beach-gevangenis in Ekwatoriaal-Guinee (EG) en oud-Namibiër die EG se visepresident vir onregmatige aanhouding sonder verhoor hof toe gesleep het.
Mnr. Daniel Welman Janse van Rensburg (51) is vir 423 dae in die Black Beach-tronk in Malabo (EG) en ook vir 126 dae in ‘n huis in dieselfde stad aangehou. Hy is in Augustus 2015 uiteindelik vrygelaat. Janse van Rensburg, ‘n oud-Namibiër wat huidig in Hoekwil in Suid-Afrika woon, se aanhouding het gevolg nadat ‘n regter opdrag gegee het dat hy vry was om die land te verlaat.
Volgens Janse van Rensburg is hy aangehou sonder dat enige aanklagte teen hom ingedien, hy verhoor of gevonnis is, maar wel in opdrag van mnr. Teodorin Nguema Obiang wat geweier het dat hy vrygelaat word. Obiang was die tweede visepresident van die EG vir veiligheid en sekuriteit en is die politieke hoof en in beheer van die land se gewapende magte, polisie, tronke en aanhoudingsgeriewe. Hy is voorts die de facto-staatshoof van EG en sal na verwagting sy bejaarde en siek pa as staatshoof opvolg.
Obiang is die eerste respondent in Janse van Rensburg se saak teen die regering, met die registrateur van akte in die Wes-Kaap wat as tweede respondent gelys is. Laasgenoemde het betrekking op die registrasie van die akte van twee vaste bates van Obiang in die Wes-Kaap wat deel van die eis vorm.
Janse van Rensburg eis skadevergoeding van N$75 miljoen wat onder meer betrekking het op sy verlies van sy vryheid en die liefde en aandag van sy vrou en gesin vir ‘n tydperk van 549 dae, onmenslike en vernederende behandeling, siektes wat hy in die tyd opgedoen het en permanente, onomkeerbare fisieke skade veroorsaak het, psigologiese trauma wat hy verduur het, sy permanente onvermoë om weer te kan werk, sowel as N$200 000 wat deur sy familie en vriende ingesamel en betaal is om sy vrylating te verseker.
Janse van Rensburg se aanhouding in Black Beach was vanaf 18 Desember 2013 tot 28 Februarie 2014. Hy is vir die tweede keer hier vanaf 4 Julie 2014 tot 26 Augustus 2015 aangehou. Vir die tydperk 28 Februarie 2014 tot 4 Julie 2014 is hy in haglike omstandighede in ‘n eiendom in Malabo aangehou waar hy konstant dopgehou is.
Janse van Rensburg het in ‘n onderhoud met Republikein gesê Obiang se advokaat het van die aanvang van die saak “alles gedoen om dit uitgegooi te kry en natuurlik uit te stel”.
“Soos ek op die internet sien, is daar baie sake teen Obiang (jr.) en ek glo my saak sal ook nog ander mense die moed gee om dit te doen.”
Volgens Janse van Rensburg het hy deurentyd sy onskuld beklemtoon.
“Wat hierdie mense aan my en my gesin gedoen het, was nie reg nie. Tot ‘n mate kan ek van my verlore inkomste terugkry en aangaan met ons lewe. Dit was nie wraak nie, ek het lankal geleer dit moet ek in die hande van die Vader los.”
Hy het voorts gesê baie tyd en aandag is in die kontrak gesit wat sy aanhouding voorafgegaan en hy gevolglik verloor het.
“Die wen van die saak sal aan almal bewys dat ek onskuldig was. Dit sal ‘n afsluiting vir ons wees, maar die twee jaar van trauma sal nog ‘n rukkie vat om te genees.”
Op die oomblik fokus hy op sy getuienis en ‘n belofte wat hy aan God gemaak het om te vertel “hoe Hy my opgepas het!”
“Intussen probeer ek ‘n boek skryf, maar daarmee sukkel ek nog baie. Dis nie altyd lekker om terug te gaan om te krap aan iets wat jy wil vergeet nie.”
Hy het sy en sy gesin se dankbaarheid uitgespreek teenoor al hul vriende en familie in Namibië vir hul gebede en ook geld wat vir sy vrylating gestuur is.
“Ons hoop om later die jaar te kom kuier en te gaan getuig oor wat ‘n wonderbare God ons dien.”
Mnr. Daniel Welman Janse van Rensburg (51) is vir 423 dae in die Black Beach-tronk in Malabo (EG) en ook vir 126 dae in ‘n huis in dieselfde stad aangehou. Hy is in Augustus 2015 uiteindelik vrygelaat. Janse van Rensburg, ‘n oud-Namibiër wat huidig in Hoekwil in Suid-Afrika woon, se aanhouding het gevolg nadat ‘n regter opdrag gegee het dat hy vry was om die land te verlaat.
Volgens Janse van Rensburg is hy aangehou sonder dat enige aanklagte teen hom ingedien, hy verhoor of gevonnis is, maar wel in opdrag van mnr. Teodorin Nguema Obiang wat geweier het dat hy vrygelaat word. Obiang was die tweede visepresident van die EG vir veiligheid en sekuriteit en is die politieke hoof en in beheer van die land se gewapende magte, polisie, tronke en aanhoudingsgeriewe. Hy is voorts die de facto-staatshoof van EG en sal na verwagting sy bejaarde en siek pa as staatshoof opvolg.
Obiang is die eerste respondent in Janse van Rensburg se saak teen die regering, met die registrateur van akte in die Wes-Kaap wat as tweede respondent gelys is. Laasgenoemde het betrekking op die registrasie van die akte van twee vaste bates van Obiang in die Wes-Kaap wat deel van die eis vorm.
Janse van Rensburg eis skadevergoeding van N$75 miljoen wat onder meer betrekking het op sy verlies van sy vryheid en die liefde en aandag van sy vrou en gesin vir ‘n tydperk van 549 dae, onmenslike en vernederende behandeling, siektes wat hy in die tyd opgedoen het en permanente, onomkeerbare fisieke skade veroorsaak het, psigologiese trauma wat hy verduur het, sy permanente onvermoë om weer te kan werk, sowel as N$200 000 wat deur sy familie en vriende ingesamel en betaal is om sy vrylating te verseker.
Janse van Rensburg se aanhouding in Black Beach was vanaf 18 Desember 2013 tot 28 Februarie 2014. Hy is vir die tweede keer hier vanaf 4 Julie 2014 tot 26 Augustus 2015 aangehou. Vir die tydperk 28 Februarie 2014 tot 4 Julie 2014 is hy in haglike omstandighede in ‘n eiendom in Malabo aangehou waar hy konstant dopgehou is.
Janse van Rensburg het in ‘n onderhoud met Republikein gesê Obiang se advokaat het van die aanvang van die saak “alles gedoen om dit uitgegooi te kry en natuurlik uit te stel”.
“Soos ek op die internet sien, is daar baie sake teen Obiang (jr.) en ek glo my saak sal ook nog ander mense die moed gee om dit te doen.”
Volgens Janse van Rensburg het hy deurentyd sy onskuld beklemtoon.
“Wat hierdie mense aan my en my gesin gedoen het, was nie reg nie. Tot ‘n mate kan ek van my verlore inkomste terugkry en aangaan met ons lewe. Dit was nie wraak nie, ek het lankal geleer dit moet ek in die hande van die Vader los.”
Hy het voorts gesê baie tyd en aandag is in die kontrak gesit wat sy aanhouding voorafgegaan en hy gevolglik verloor het.
“Die wen van die saak sal aan almal bewys dat ek onskuldig was. Dit sal ‘n afsluiting vir ons wees, maar die twee jaar van trauma sal nog ‘n rukkie vat om te genees.”
Op die oomblik fokus hy op sy getuienis en ‘n belofte wat hy aan God gemaak het om te vertel “hoe Hy my opgepas het!”
“Intussen probeer ek ‘n boek skryf, maar daarmee sukkel ek nog baie. Dis nie altyd lekker om terug te gaan om te krap aan iets wat jy wil vergeet nie.”
Hy het sy en sy gesin se dankbaarheid uitgespreek teenoor al hul vriende en familie in Namibië vir hul gebede en ook geld wat vir sy vrylating gestuur is.
“Ons hoop om later die jaar te kom kuier en te gaan getuig oor wat ‘n wonderbare God ons dien.”
Kommentaar
Republikein
Geen kommentaar is op hierdie artikel gelaat nie