Ou wrak word nuwe bate

Net soms is die klipsmouse en ‘n bedelaar of twee lastig, maar die wrak van die Zeila naby Die Walle suid van Hentiesbaai bly een van die gewildste aandoenpunte onder toeriste op die roete na die noordkus en oor Uis na die wondere van Damaraland en Kaokoland. Dit was bra koud omstreeks nege-uur op ‘n Dinsdagoggend toe ‘n verslagspan van Republikein die afdraaipaadjie na die wrak gevolg het. By die stilhouplek was elf voertuie, waaronder ook ‘n paar toerbusse met dosyne toeriste op die woestynroete. Video-opnames is gemaak en honderde foto’s is geneem. Van die klipsmouse het ook goeie sake met veral toeriste van Gauteng gedoen. Republikein was destyds ook die enigste koerant op die toneel toe die laaste twee seerotte deur reddingswerkers van Swakopmund en Walvisbaai van die gestrande boot gehaal is. Op die toneel het ‘n klipsmous in antwoord op ‘n vraag gesê die edelstene kom hoofsaaklik van die kleinmyners in die Uis-omgewing.