Otji-raadslid van intimidasie beskuldig

Catherine Sasman - Organiseerders van die Landless People’s Movement (LPM) beskuldig mnr. Julius Neumbo, die Swapo-raadslid op Otjiwarongo, daarvan dat hy die kieserkaarte van minstens 60 ondersteuners van dié beweging gekonfiskeer het.Inwoners van die Ombili- informele nedersetting het na wat berig word hul steun aan die LPM toegesê om by die Verkiesingskommissie van Namibië (ECN) as ‘n party te registreer met die oog op die nasionale verkiesing aanstaande jaar.Die LPM-organiseerder, mnr. Frans Pemboma, sê Neumbo het verlede Sondag, vergesel van twee mans, by sy huis opgedaag en daarop aangedring dat hy die kieserkaarte wat hy ingesamel het, aan hom oorhandig.Hy sê Neumbo het die kaarte geneem en gesê die kiesers moet na sy kantoor gaan indien hulle hul kaarte wil terughê. Volgens Pemboma is dit ‘n poging om die mense wat by die LPM wil aansluit, te intimideer.‘n Ander LPM-organiseerder, mnr. Jakob Hausiku, het dit bevestig en sê hy is op 26 Junie deur ‘n inligtingsoffisier van die polisie, slegs bekend as Carlos, genader. Laasgenoemde wou hom (Hausiku) na bewering na die polisiekantoor vir ondervraging neem.Hausiku voer verder aan onbekende polisiebeamptes het inwoners van Ombili “gedreig” om nie aan die LPM se aktiwiteite deel te neem nie.Neumbo ontken hierdie beweringe en sê Pemboma het hom gevra om die kieserkaarte vir veilige bewaring saam met hom te neem en benadruk hy het dit nie gekonfiskeer nie.Volgens hom was hy in die Noorde toe hy ingelig is mense word geregistreer. Hy het die burgemeester, mnr. Bennes Haimbondi, gebel om vas te stel wat aangaan. Terug op dié dorp het hy gehoor die registrasierye raak al langer en hy het radioluisteraars via die NBC se Oshiwambo-diens teen “verdagte optrede” gewaarsku.“Dit is nie die eerste keer dat hierdie tipe mense daardie gemeenskappe registreer nie. ‘n Vorige keer moes kiesers N$40 betaal en huise is aan hulle belowe. Dit is hoekom ek gedink het ek moet die mense waarsku,” sê Neumbo. Hy het dit ook met die ECN bespreek.Hy hou vol hy het gedink iemand wil die mense inloop en sê hy sal hul kieserkaarte teruggee. “Ek is nie ‘n Swapo-raadslid nie. Ek is ‘n raadslid vir die regering,” sê hy. Die LPM-organiseerders ontken Neumbo se aantygings ten sterkste en sê hulle wou net mense registreer en het nie vir hulle huise belowe nie. Die vorm wat mense moet voltooi, dui ook duidelik aan dit is met die oog op die LPM se registrasie by die ECN as politieke party.Mnr. Henny Seibeb, die LMP se nasionale sekretaris, sê hy het Neumbo oor die kwessie gebel en voer aan sy optrede was duidelik daarop gemik om ondersteuners te intimideer.“Ek het aan hom verduidelik hoe demokrasie werk en dat daar vir enige party of burgerlike beweging ruimte is. Die politieke ruimte is nie net vir Swapo nie; ons is nie ‘n eenpartystaat nie,” sê Seibeb.Hy beweer verder Neumbo het Ombili saam met die polisie besoek om LPM-ondersteuners te verhoed om aan te sluit. Hy meen Swapo se sekretaris-generaal, mnr. Sophia Shaningwa, en die hoof van die polisie, lt.genl. Sebastian Ndeitunga, moet teen Neumbo optree.Die hoof van die polisie in die Otjozondjupastreek, komm. Heinrich Tjiveze, sê die LPM-leier, mnr. Bernadus Swartbooi, het met hom oor die kwessie gepraat. “Hy het nie vir my enigiets konkreet gegee nie en daarsonder kan ek dit nie amptelik opvolg nie,” sê hy.

Otji-raadslid van intimidasie beskuldig

Kommentaar

Republikein 2025-09-19

Meld asseblief aan om kommentaar te lewer

Otji-raadslid van intimidasie beskuldig

Kommentaar

Republikein 2025-09-19

Meld asseblief aan om kommentaar te lewer

MELD AAN

Advertensie