Otji-fees verwelkom vegters in aksie

Tielman van Lill - Die Salute Boks-akademie bied komende Saterdag in Otjiwarongo by die Paresis-stadion nege professionele gevegte aan.

In die hoofgeveg van agt rondes maak Paulus Ambunda (The Rock) vir die eerste keer in meer as vyftien maande sy terugkeer tot die kryt.

Die 37-jarige Ambunda het verlede jaar op 11 Junie in Windhoek by die Ramatex-sentrum eenparig oor 12 rondes met punte teen Moises Flores van Mexiko verloor. Dit het hom sy superkapokgewig wêreldtitel van die Wêreldboksorganisasie (WBO) gekos.

Sedertdien het die sakgrootte vegter nie weer geboks nie en onlangs het hy ook van promotor verander om weer sy loopbaan om dreef te kry.

Ambunda sê hy is uitgerus en gereed om weer die beste in sy gewigsafdeling te word. Hoewel sy naam tans nie op een van die toonaangewende internasionale boksliggame se ranglys te verskyn nie, kan hy Saterdag met 'n oorwinning teen Tasha Mjuaji van Tanzanië vinnig vordering op die WBO se wêreldranglys maak.

Ambunda het op 1 Augustus 2015 die vakante superkapokgewig wêreldtitel van die Internasionale Boksorganisasie (IBO) teen Leonardo Esperante van Argentinië in Windhoek ingepalm. Daarna verdedig hy dit een keer suksesvol in Windhoek teen die Australiër Jason Cooper, waarna hy dit aan Flores afstaan.

Ambunda se ervaring wat hy in 24 oorwinnings en twee verloorslae opgebou het, is goud werd – benewens die feit dat hy tevore ook die wêreldtitel in die ligter gewigsklas (kapokgewig) gehou het.

Dié Tanzaniër se rekord in 23 gevegte (15 oorwinnings, ses verloor en twee gelykop) is self nie te versmaai nie en dalk vind hy net die regte medisyne om die tuisbokser behoorlik te toets.

Ambunda is nog nooit uitgeslaan en hy versoek boksondersteuners van Otjiwarongo en die omliggende omgewing om in groot getalle na die gevegte moet kom kyk wat Saterdag om 14:00 afskop.

“Ek het lank en goed voorberei om die beste vertoning moontlik vir die mense op Otjiwarongo te gee. Ek het vandag nie veel te sê, net dat ons 'n wenspan bymekaar is en ek die geveg gebruik om sake reg te stel.

“Die nasie het lank gewag om weer The Rock in die kryt te sien. Ek is fiks en sonder enige beserings. Ek vra almal in Otjiwarongo om na ons gevegte te kom kyk. Boks is 'n opwindende en dinamiese sport en ons is daar om julle te vermaak. Kom skree vir jou gunsteling bokser,” het die uiters gewilde Ambunda gesê.

Die boksers sal Vrydagoggend om negeuur by die Paresis-stadion inweeg waar die boksers ook dan teen mekaar opgestel word vir die gebruiklike aangluursessies wat tot groot vermaak van omstanders lei. Almal is welkom om die geesvang vir die naweek se boks by te woon.

Die lys van gevegte vir Saterdag (al die boksers is van Namibië tensy anders aangedui):

1 Kapokgewig (53.50 kg) 4 rondes: Luben Kandimba (professionele debuut) teen Josef Mateus (2 gewen, drie verloor).

2. Liggewig (61.4 kg) 4 rondes: Lazarus Shaningwa (professionele debuut) tn Festus Matias (1W, 1L).

3. Ligswaargewig (79.38 kg) 6 rondes: Mujandjae Kasuto (professionele debuut) tn Nowell Mpofu van Zimbabwe (1W, 1L).

4. Super kapokgewig (55.30 kg) 6 rondes: Jonas Mateus (7W, 1L, 1D) tn Phillipus Nghitumbwa (2W).

5. Junior middelgewig (69.85 kg) 8 rondes: Vakufilapo Nashivela (4W) tn Christian Ukelo (7W, 5L).

6. Middelgewig (72.56 kg) 6 rondes: Lukas Ndafoluma (10W, 1L) tn Martin Tsuma van Zimbabwe (5W, 3L).

7. Ligswaargewig (79.38 kg) 6 rondes: Wilbeforce Shihepo (23W, 9L) tn Anos Temfuma van Zambië (8W, 1L, 1D).

8. Nasionale tussentydse veergewigtitel (57.15 kg) 10 rondes: Nathanael Kakololo (8W, 1L, 1D) tn Matheus Kandala (5W, 10L).

9. Veergewig (57.15 kg) 8 rondes: Paulus Ambunda (24W, 2L) tn Tasha Mjuaji van Tanzanië (15W, 6L, 2D).

Toegang tot die feesterrein kos N$150 vir volwassenes, N$70 vir tieners en N$30 vir kinders by Webticket in Pick a Pay. By die hek verander die pryse onderskeidelik na N$250, N$100 en N$50.