Oshikango-inwoners soek geregtigheid

Tuyeimo Haidula op Oshikango – Honderde betogers het weer in Oshikango opgeruk en eis geregtigheid vir die moord op die 30-jarige mnr. Lebeus Wambalili wat na bewering in die Onamhinda-nedersetting koelbloedig deur 'n polisiebeampte geskiet is.'n Passasier in die voertuig, me. Ndilimeke Mwalengelwange, is in die voorval gewond en is in 'n kritieke toestand in die staatshospitaal op Oshakati. Na bewering het polisiebeamptes die oorledene en sy passasier naby die Oshikango-grenspos van agter geskiet. Dit is die tweede optog sedert die voorval. Amper twee weke ná die voorval is niemand nog in hegtenis geneem nie aangesien die beampte wat die skoot afgevuur het nog nie geïdentifiseer is nie. Op van die plakkate het gestaan: “Die moord van die onskuldige Lebeus maak ons angstig. Ons benodig geregtigheid; hou op om ons te vermoor. Is ek skuldig omdat ek naby die grens woon? Lebeus se lewe het saak gemaak.”Die groep eis dat polisiebeamptes moet ophou om hulself te beskerm en om nie so vinnig die sneller te trek nie as hulle probleme op 'n vreedsame manier kan oplos en sterftes vermy. Die familie van Wambalili het bygevoeg hulle sal slegs vrede vind as die moordenaar gevind word en geregtigheid geskied. Mnr. Immanuel Shikukwete, die woordvoerder van die groep het die petisie aan die stasiebevelvoerder van Oshikango, hoofinsp. Sakaria Mudjanima, oorhandig. “Ons lewe in vrees langs die Namibies-Angolese grens, omdat die polisiebeamptes so behep is om vinnig die sneller te trek.”Shikukwete het gesê Wambalili was die broodwinner van sy gesin en dat hy 'n verantwoordelike man was wat die rol van sy ouers oorgeneem en vir sy broers en susters gesorg het. Hul ouers is op 'n jong ouderdom dood. Mudjanima het die petisie aanvaar en belowe hy sal dit na die regte owerhede stuur. Die betogers het gesê Wambalili se begrafnis sal nie voortgaan totdat hulle weet wie die skuldige is en hy in hegtenis geneem is nie. Hulle het die polisie tien dae gegee om op te tree.– republikein@republikein.com.na

Oshikango-inwoners soek geregtigheid

Kommentaar

Republikein 2025-12-18

Meld asseblief aan om kommentaar te lewer

Oshikango-inwoners soek geregtigheid

Kommentaar

Republikein 2025-12-18

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.