Orkaan Willa: 'Moenie probeer macho wees'

Duisende mense het Dinsdag hul huise ontruim voordat die orkaan Willa Mexiko van die Stille Oseaan se kant af tref.

Inwoners van Mazatlán, 'n gewilde vakansieplek langs die kus, het Maandag reeds hul vensters en deure met groot houtplanke toegemaak terwyl toeriste verbygedrentel het en palmbome in 'n ligte briesie heen-en-weer gewaai het.

Volgens die nasionale orkaansentrum het die orkaan teen Dinsdag reeds tot 280 km suidwes van Mazatlán gevorder. Ander toeristeplekke soos Nayarit en Puerto ­Vallarta sal ook deur die stormsterk winde geraak word, het die orkaansentrum gesê. Weerkundiges voorspel dat die orkaan sal verswak nadat dit die kusgebied tref.



MOENIE STORM ONDERSKAT

Antonio Echevarría, goewerneur van Nayarit, het gesê dat meer as 10 000 mense ontruim word en gewaarsku dat inwoners nie die storm moet onderskat nie. “Moenie probeer macho wees nie. Die orkaan is uiters sterk. Ons wil nie enige tragedies hê nie,” het Echevarría gesê.

Ondanks die gevaar het sommige toeriste 'n traak-my-nieagtige houding jeens die orkaan.

“Dit vat nie die plesier weg om hier te wees nie,” het een vakansieganger, Angel Avelar, gesê terwyl hy 'n bier oopgemaak het. “Miskien is dinge môre anders,” het hy gesê.

– Netwerk24/Reuters