Oranjemund tooi op in kunswerke

Tanja Bause – Oranjemund spog met unieke muurskilderye en beeldhouwerke wat die dorp verfraai. Die kunswerke is deur Namibiese kunstenaars geskep en die OMDis Town Transform Agency is die agentskap agter dié projek. “Mynbou was die hartklop van die dorp die afgelope 85 jaar en Oranjemund was afgesonder met streng veiligheidsmaatreëls tot 2017 toe dit vir die wêreld oopgemaak is,” sê me. Ronel van der Merwe van ODMis.OMDis is gestig om plaaslike entrepreneurs te bevorder, plaaslike besighede te ondersteun en om die dorp se volhoubaarheid te verseker deur sektore soos landbou en toerisme te bevorder en mense te lok.Een so 'n projek in die toerismestrategie is kuns en kultuur. Dis wêreldwyd bewys dat kuns 'n dorp se ekonomie 'n hupstoot kan gee, soos in Prince Albert en Bilboa in die RSA. OMDis het verskeie Namibiese kunstenaars aangestel om kunswerke vir die Art Can Transform-projek te skep. In Maart het die kunstenaars na Oranjemund gereis om met die projek te begin. Nadat die planne goedgekeur is, het hulle in Mei en Junie begin skilder en skep.Aurelia Sieberhagen, Charne Witbooi en Annis Schlechter, kunstenaars van Oranjemund, en Windhoek-kunstenaars Tity Shilumba, Petrus Amuthenu, Frans Uunona en Nicky Marais was verantwoordelik vir nege muurskilderye. Die skilderye beeld die dorp se omgewing, die geskiedenis van mynbou en sy toekoms uit.Beeldhouers Elisia Nghidishange, Saima Iita, Ismael Shivute en Hercules Viljoen het drie standbeelde in hul studios gesweis en gekerf. Die beelde sal op strategies plekke in die dorp geplaas word. “Dit was 'n ongelooflike bevredigende projek, veral omdat die gemeenskap die skilderye regtig aanvaar en deurlopend met die kunstenaars gesels het. Hierdie projek is beslis goed vir Oranjemund en enig in sy soort in Namibië,” sê Van der MerweFrans Uunona se muurskildery beeld 'n mynwerker se stewels uit. Hy het hierop besluit omdat dit 'n noodsaaklike deel van die werkers se veiligheidsmondering is. “Dit is baie hartseer dat 'n klein dorp soos Oranjemund sulke muurskilderye en standbeelde in hulle dorp het en ons hier in die hoofstad het niks nie. Hulle waardeer kuns en gebruik dit om die geskiedenis van die dorp en omgewing uit te beeld. Sodoende bevorder en ondersteun hulle ook Namibiese kunstenaars. Kuns bring wêrelde bymekaar en ek voel Windhoek as die hoofstad kan gerus hulle voorbeeld volg,” sê Uunona.– tanja@republikein.com.naFOTO’sNamibiese kunstenaars het nege muurskilderye in Oranjemund geskilder. Foto verskafDrie verskillende standbeelde sal in die volgende twee weke in die dorp opgestel word.

Oranjemund tooi op in kunswerke

Kommentaar

Republikein 2026-02-03

Meld asseblief aan om kommentaar te lewer

Oranjemund tooi op in kunswerke

Kommentaar

Republikein 2026-02-03

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.