Oranjemund oorhandig
Alle bates en dienste is nou in die dorp se besit.
Yochanaan Coetzee
Oranjemund, met al sy bates en dienste, is vandeesweek amptelik deur Namdeb, wat dit vir die afgelope 80 jaar besit en bedryf het, aan die dorpsraad oorhandig.
Vir die eerste keer in die geskiedenis sal die publiek amptelik eiendom op die dorp kan besit.
Dít kom nadat Namdeb en Oranjemund se dorpsraad dié week ná drie jaar se onderhandelinge 'n ooreenkoms aangegaan het waarvolgens meer as N$300 miljoen se bates en dienste amptelik aan die dorpsraad oorgedra is.
Vandeesweek Maandag, enkele maande ná die voormalige myndorp, voorheen 'n spergebied, se hekke vir die eerste keer vir die publiek geopen is, het mnr. Riaan Burger, Namdeb se uitvoerende hoof, en mnr. Henry Coetzee, Oranjemund se burgemeester, die langverwagte ooreenkoms tydens 'n geleentheid op die dorp onderteken.
“Ek glo vandag was 'n dag waarop ons almal sedert die dorp se proklamasie gewag het.
“Dit is beslis 'n geskiedkundige dag en ons sien uit daarna om te sien hoe Oranjemund se ekonomie gaan groei en uitbrei,” het Burger tydens die geleentheid gesê.
Coetzee het verlede jaar by die amptelike opening van die dorp gesê die oorgang behels nie net geleenthede nie, maar ook uitdagings.
“Ons is deeglik bewus daarvan dat die reis vol uitdagings sal wees, maar ook vol geleenthede omdat ons so 'n jong dorp is. As jy byvoorbeeld na ons jong eiendomsmark kyk, was daar nog nooit eers 'n eiendomsagent op die dorp nie.
“Dit wys net hoeveel ruimte vir nuwe besighede en bedrywe daar op Oranjemund is,” het hy gesê.
Op goeie voet
As deel van die ooreenkoms sal Namdeb die dorp se infrastruktuur gedeeltelik opknap, wat die dorp se ou munisipale dienste insluit.
“Namdeb vestig hiermee hul nalatenskap en ondersteun ons as dorpsraad sodat ons die dorp se ontwikkelingsdoelwitte kan bereik,” het Coetzee gesê.
Ander ontwikkelings in die vooruitsig sluit in 'n nuwe aansoek vir die ontwikkeling van 'n boetiekhotel op die dorp, asook die nuwe Marina-strandontwikkeling.
Tans is ook meer as 300 nuwe erwe beskikbaar gestel en meer ontwikkeling word vir die wenner van vanjaar se NTE Klein Dorp van die Jaar verwag.
Oranjemund, met al sy bates en dienste, is vandeesweek amptelik deur Namdeb, wat dit vir die afgelope 80 jaar besit en bedryf het, aan die dorpsraad oorhandig.
Vir die eerste keer in die geskiedenis sal die publiek amptelik eiendom op die dorp kan besit.
Dít kom nadat Namdeb en Oranjemund se dorpsraad dié week ná drie jaar se onderhandelinge 'n ooreenkoms aangegaan het waarvolgens meer as N$300 miljoen se bates en dienste amptelik aan die dorpsraad oorgedra is.
Vandeesweek Maandag, enkele maande ná die voormalige myndorp, voorheen 'n spergebied, se hekke vir die eerste keer vir die publiek geopen is, het mnr. Riaan Burger, Namdeb se uitvoerende hoof, en mnr. Henry Coetzee, Oranjemund se burgemeester, die langverwagte ooreenkoms tydens 'n geleentheid op die dorp onderteken.
“Ek glo vandag was 'n dag waarop ons almal sedert die dorp se proklamasie gewag het.
“Dit is beslis 'n geskiedkundige dag en ons sien uit daarna om te sien hoe Oranjemund se ekonomie gaan groei en uitbrei,” het Burger tydens die geleentheid gesê.
Coetzee het verlede jaar by die amptelike opening van die dorp gesê die oorgang behels nie net geleenthede nie, maar ook uitdagings.
“Ons is deeglik bewus daarvan dat die reis vol uitdagings sal wees, maar ook vol geleenthede omdat ons so 'n jong dorp is. As jy byvoorbeeld na ons jong eiendomsmark kyk, was daar nog nooit eers 'n eiendomsagent op die dorp nie.
“Dit wys net hoeveel ruimte vir nuwe besighede en bedrywe daar op Oranjemund is,” het hy gesê.
Op goeie voet
As deel van die ooreenkoms sal Namdeb die dorp se infrastruktuur gedeeltelik opknap, wat die dorp se ou munisipale dienste insluit.
“Namdeb vestig hiermee hul nalatenskap en ondersteun ons as dorpsraad sodat ons die dorp se ontwikkelingsdoelwitte kan bereik,” het Coetzee gesê.
Ander ontwikkelings in die vooruitsig sluit in 'n nuwe aansoek vir die ontwikkeling van 'n boetiekhotel op die dorp, asook die nuwe Marina-strandontwikkeling.
Tans is ook meer as 300 nuwe erwe beskikbaar gestel en meer ontwikkeling word vir die wenner van vanjaar se NTE Klein Dorp van die Jaar verwag.
Kommentaar
Republikein
Geen kommentaar is op hierdie artikel gelaat nie