Opvallende insluitings vir Afrika-spele

Andrew Poolman - Die Namibiese Fietsryfederasie het sy beste padfiets- en bergfietsryers aangewys om in die laaste week van Augustus by die Afrika-spele in Rabat, Marokko, te gaan aanmeld.Die span is:Vroue: Michelle Vorster, Vera Adrian.Mans: Xavier Papo, André de Klerk, Alex Miller, Tristan de Lange, Dan Craven, Danzel de Koe, Drikus Coetzee, Martin Freyer.Bestuurspan: Hans du Toit (afrigter), Aidan de Lange (spanbestuurder), Little John (meganikus).Elkeen van die gekose ryers se vernuf en veggees is welbekend en die verwagting is dat die span hom opnuut as 'n krag op kontinentale vlak kan vestig. Vir verskeie van hulle is hul insluiting 'n persoonlike mylpaal – in die besonder vir Michelle Vorster, wat saam met Alex Miller en Tristan de Lange vir die bergfietsresiese nader geroep is.Vorster was in April vanjaar in 'n ernstige botsing betrokke toe 'n motoris haar van die pad af gery het terwyl sy op die hoofpad noord van Windhoek met haar fiets gery het. In die impak het die Olimpiese ryer van 2016 in Rio de Janeiro haar regterelmboog vergruis en ook haar enkel gebreek.“Dit gaan goed met my herstel en ek is weer volstoom aan die oefen. Ek het 'n afspraak oor sowat twee weke met die dokter om 'n aanbeveling te maak of ek op 21 Julie aan die Namibiese nasionale veldresieskampioenskap behoort deel te neem. Sy aanbeveling sal waarskynlik ook op die Afrika-spele van toepassing wees.“My beserings in die ongeluk het goed herstel, behalwe vir my elmboog wat ook reeds omtrent tagtig persent reg is. Maar ek is reeds terug op die fiets en ek is positief,” het Vorster gister aan die koerant gesê.Afrigter Hans du Toit sê Vorster se rehabilitasie is op koers en dat sy reeds op die oefenfiets aan die werk is. “Ek glo sy kan en behoort gereed te wees vir die toer.”Nog 'n bergfietsryer, Tristan de Lange, se terugkeer word ook verwelkom nadat hy in Maart vanjaar 'n kleinerige hartoperasie ondergaan het. In De Lange se afwesigheid het die 18-jarige Alex Miller met sy eerste deelname op senior elite vlak 'n merkwaardige bronsmedalje by die Afrika-bergfietskampioenskap in Windhoek verower.Du Toit sê hy reken dat Namibië 'n goeie kans staan om medaljes van sy padfietsryers te verwag.“In die padfietsry vir mans word ons net toegelaat om ses ryers te stuur. Die vier wat ons in die spantydtoets behoort te verteenwoordig, is Drikus Coetzee, André de Klerk, Dan Craven en Martin Freyer,” sê Du Toit. “Danzel de Koe en Xavier Papo sal saam met die ander vier Namibië se aanslag op die padresies van stapel stuur.”Dan Craven en Drikus Coetzee het in Februarie vanjaar onderskeidelik die Namibiese nasionale titels in die padfietsresies en die individuele tydtoets ingepalm, terwyl Vera Adrian beide titels aan die vrouekant verower het. Die Afrikaspele sal vir fietsryers geen invloed op Olimpiese kwalifikasie vir Tokio 2020 hê nie, met punte op die UCI wêreldranglys die enigste beloning vir goeie prestasie. Medaljes op hierdie hoë vlak van Afrika-kompetisie dra nietemin heelwat gewig en prestige.NUWELINGDie 28-jarige André de Klerk se insluiting om vir die eerste keer 'n Namibiese fietsryspan te verteenwoordig, is 'n beloning vir die sukses wat hy sedert sy toetrede tot die sport behaal het.De Klerk was nog 'n matriekseun in HTS Windhoek toe hy as rugbyspeler gekies is om Namibië op toetsvlak te verteenwoordig. Sy verskyning vanaf die reserwebank as slot teen Ivoorkus in Abidjan in 2009 (ouderdom 18 jaar en 176 dae) maak hom tot vandag toe die tweede jongste toetsspeler in die land se geskiedenis, ná Chris Arries vier jaar later (18 jaar en 36 dae). Ongelukkig het nie een van die twee jonges daarna weer toetsrugby gespeel nie.De Klerk se rugbyloopbaan is kortgeknip toe hy in dieselfde jaar vir 'n anaboliese steroïed positief getoets en vir twee jaar geskors is. Dit het hom buite rekening vir die 2011 Wêreldbeker geplaas en om sake te vererger, het hy kort voor die verstryking van die skorsing wéér positief vir 'n verbode middel getoets. Dié keer het die destydse Internasionale Rugbyraad hom 'n skorsing vir agt jaar opgelê, wat effektief 'n einde aan sy belowende rugbyloopbaan gebring het.Sedert sy oorskakeling na fietsry het De Klerk hom stelselmatig opgewerk as een van die mees bestendige ryers op die plaaslike toneel. In Februarie vanjaar het hy die silwermedalje by die nasionale tydtoetskampioenskap ná Drikus Coetzee verower. Dit was opnuut 'n verbetering in vergelyking met 2018 en 2017 se derde en sewende plekke, onderskeidelik.“Ek is baie geëerd dat die Fietsryfederasie potensiaal in my raaksien en ek is baie opgewonde oor die kans om my land te verteenwoordig,” het De Klerk gister aan die koerant gesê.“Ná ses jaar in die sport maak hierdie nuus al die opofferings die moeite werd, want dit was beslis 'n mikpunt. Baie mense het al vir my gesê dat iemand met my lengte en wat meer as 90 kg weeg, nie sommer die paal sal haal in fietsry op internasionale vlak nie, maar ek het van nature ambisie om hoër doelwitte te bereik en ses jaar se aanhou en uithou is nou uiteindelik beloon.”De Klerk sê sy transformasie – vanaf 'n rugbyspeler wat op sy swaarste 124 kg geweeg het, tot fietsryer wat nou die skaal op 97 kg trek – was fisiek en geestelik 'n meer veeleisende toets as wat hy ooit op die rugbyveld teëgekom het.“Jou hele denkwyse is anders. As rugbyspeler, veral in die vaste vyf, kan jy basies eet wat jy wil en jy oefen hard met swaar gewigte om groter as jou opposisie te word. Elke keer as jy op die skaal klim, verwag jy basies om 'n hoër syfer te sien. “In fietsry is dit die teenoorgestelde en moet jy jou kalorieë en inname van koolhidrate en proteïen deurentyd monitor.“Ek sien uit daarna om die talent en drome wat met die einde van my rugbyloopbaan doodgeloop het, tot sy reg te laat kom en vir die foute in my rugbyloopbaan te vergoed. “Ek weet dat my deurbraak in fietsry deur harde werk en baie ure bereik is en nie danksy die gebruik van enige onwettige middels nie.”

Opvallende insluitings vir Afrika-spele

Kommentaar

Republikein 2026-06-19

Meld asseblief aan om kommentaar te lewer

Opvallende insluitings vir Afrika-spele

Kommentaar

Republikein 2026-06-19

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.