Opul skrik nie vir Trump se oliesanksies

Francois Williams - Is die olieprys weer op pad na US$100 per vat? Markwaarnemers gis oor dié moontlikheid te midde van nuwe spanning in die Midde-Ooste en produksie in Venezuela wat skerp val.Maar die Organisasie van Petroleumuitvoerlande (Opul), die oliekartel van meestal Midde-Oosterse olieproduserende lande, lyk nie bekommerd daaroor dat Amerikaanse sanksies op Iran, een van Opul se lede, se produksie ’n impak sal hê nie.Die nuwe Amerikaanse sanksies teen Iran tree eers in November in werking, en Opul meen hulle is nie haastig om nou hul produksievlakke aan te pas nie, volgens Tom Kool, redakteur van Oilprice.com, ’n nuusbrief oor die oliemark.Opul sal in Junie in Wene, Oostenryk, vergader om die huidige stand van die oliemark te evalueer.Hoewel ’n perk op die olie-uitvoer van Iran die oliemark onder druk kan plaas en pryse kan opjaag, is daar tans ’n redelike ooraanbod van olie. Oliehandelaars sê daar is heelwat olievoorraad in China, Wes-Afrika, die noordweste van Europa en aan die Middellandse See wat nog onverkoop is.China en Suid-Korea is die grootste aankopers van Iranse olie, en die sukses van Amerika se sanksies teen Iran sal afhang van die besluite van dié twee lande.Die Verenigde Arabiese Emirate (VAE) se energieminister het die naweek gesê die Opul-lede Saoedi-Arabië, Koeweit en die VAE het genoeg produksievermoë om as buffer te dien ingeval Iran se produksie ingeperk word.Die nuusdiens Bloomberg sê in ’n meningstuk groot olieprodusente soos Rusland, die VAE en Saoedi-Arabië het nie in reaksie op Venezuela se dalende produksie hul olie-uitvoer verhoog nie, want hulle wil eerder hê die olieprys moet styg. Maar hul berekenings kan vinnig verander as Iran se olie-uitvoer skerp val.In 2011 het Saoedi-Arabië sy produksie verhoog in reaksie op Libië se dalende produksie. Toe Irak onder Amerikaanse sanksies deurgeloop het ná sy inval van Koeweit in 1990, het die res van die Opul-lande ook gehelp om die gaping te vul.Oliepryse is vanjaar al 18% hoër, en is rondom US$70 per vat op die hoogste vlakke sedert 2014. Terwyl olie-uitvoerlande die meevaller geniet, kry verbruikerlande swaar. As oliepryse styg weens ’n tekort is dit ’n negatiewe faktor, maar as pryse styg wees sterker vraag, kan dit ’n teken van stewige ekonomiese groei wees, meen Bloomberg. - Netwerk24/Bloomberg

Opul skrik nie vir Trump se oliesanksies

Kommentaar

Republikein 2025-08-05

Meld asseblief aan om kommentaar te lewer

Opul skrik nie vir Trump se oliesanksies

Kommentaar

Republikein 2025-08-05

Meld asseblief aan om kommentaar te lewer

MELD AAN

Advertensie