Opgewonde en vol ambisie na The Dome

Geskiedenis word Vrydag en Saterdag gemaak wanneer die agtste wêreldkampioenskap in JSKA-karate op Swakopmund aangebied word.
Die gasheerunie, die Namibië Shotokan Karate-akademie, het sedert 2004 in die tweejaarlikse skouspel meegeding. Die Namibiërs se medaljevertonings lees soos volg: twaalf in 2004 in Pretoria; 15 twee jaar later in New York; vyf in 2010 in Portimao, Portugal; 26 in Cancun, Mexiko in 2012 en ’n stewige 56 medaljes twee jaar gelede in Terni, Italië.
By die laaste byeenkoms in Italië het Namibië met sewe wêreldkampioene en in die algehele tweede plek op die medaljelys klaargemaak.
Namibië se natuurskoon, infrastruktuur en beskikbare tegnologie en in die besonder die fasiliteite by die Swakopmund Binnenshuise Sportsentrum (The Dome) het die besluitnemers beïndruk toe die nasionale stylhoof, Sensei Willem Burger, verlede jaar sy aanbieding in Glasgow gedoen het.
Een van JSKA se wêreldbestuurslede, mnr. Soon Pretorius van Suid-Afrika, het gesê The Dome is ’n venue van ongekende statuur en dat hy weet die byeenkoms sal met “militêre presisie” gereël word. Hy het ook ’n goeie woord vir Namibiërs se vriendelikheid en gasvryheid gedoen.
Deelnemers van twaalf lande word op die kusdorp verwag, naamlik Japan, Skotland, Engeland, Duitsland, Switserland, Angola, Botswana, Suid-Afrika, Mosambiek, die Tsjeggiese Republiek, Kenia en Palestina.
Die 2016 JSKA wêreldkampioenskap is ’n besondere mylpaal vir die sport in Namibië. “Ons sien dit as ’n ideale geleentheid om ons mooi land, asook die hoë vlak van vaardighede van die karateka van Namibië en die res van die vasteland uit te stal,” het Burger gesê.
Die eerste spanne se aankoms word van vandag af verwag.
Die wêreldkampioenskap begin Vrydag om 08:00. Die amptelike openingseremonie is die volgende dag, waarna die senior en ope afdelings se eindrondtes vir ’n hoogtepunt sal sorg.
Burger sê die gasheerspan het reeds vier byeenkomste as oefenlopies gehou en het hoë verwagtinge om goed te vaar. “Ons sien uit om ’n paar nuwe wêreldkampioene op te lewer.
“Al die opgewondenheid van die besoekende spanne om hierheen te kom, was aansteeklik en ons het vertroue dat ons die mees onvergeetlike en gewilde wêreldkampioenskap in die geskiedenis van die JSKA Shihankai gaan aanbied.”
Hy het die ondersteuning van borge soos FNB Namibia, The Dome, Maritima, Elastoplast en Bob Mould & Scheffer Architects bedank vir hul onmisbare bydrae tot die aanbieding.