Operasie Kalahariwoestyn eis eerste slagoffer

Taxibestuurder doodgeskiet

14 June 2019 | Polisie
Francoise Steynberg - Operasie Kalahariwoestyn het sy eerste slagoffer geëis toe ‘n taxibestuurder vroeg gisteroggend in die Greenwell Matongo-nedersetting in die Wanaheda-woonbuurt in die hoofstad doodgeskiet is.

Volgens ‘n woordvoerder van die Namibiese polisie, hoofinsp. Kauna Shikwambi, het lede van die operasie omstreeks 01:00 ‘n mini- mobiele padblokkade in Monicastraat in dié informele nedersetting opgestel.

“Toe ‘n taxi by die padblokkade aankom, het die taxibestuurder glo ‘n U-draai gemaak en weggejaag. ‘n Weermaglid wat saam met ‘n polisielid was, het glo ‘n skoot uit sy AK 47-aanvalsgeweer in die rigting van die taxi afgevuur,” het Shikwambi gesê.

“Die koeël het deur die kattebak van die taxi gegaan en die taxibestuurder in sy kop getref. Hy het op die toneel gesterf.”

Shikwambi het gesê die oorledene, wat nog nie geïdentifiseer is nie, was alleen in die taxi.

Die weermaglid (38), wat by die Luiperdvallei- militêre basis buite Windhoek gestasioneer is, is in hegtenis geneem.

Volgens Shikwambi sal hy vandag in die Windhoekse landdroshof in Katutura op klagte van moord en die nalatige hantering van ‘n vuurwapen verskyn.

Hewige kritiek is al uitgespreek oor brutaliteit wat glo tydens die gesamentlike operasies van die Namibiese polisie en weermag teenoor die publiek getoon word, soos tydens Operasies Hornkranz en Kalahariwoestyn.

REGSHULPSENTRUM

Me. Toni Hancox, direkteur van die Regshulpsentrum (LAC), het gesê volgens die verdedigingswet het ’n soldaat dieselfde magte en pligte as ’n polisiebeampte; dus kan hy redelike krag net in die konteks van ’n inhegtenisneming gebruik.

“In hierdie geval lyk dit of dit nie tot ’n inhegtenisneming gelei het nie, so dit is nie redelike krag nie. Daar was ander opsies soos om die buitebande te skiet of per radio ’n beskrywing van die voertuig aan ander beamptes te gee,” sê Hancox.“En waar was die waarskuwingskoot?” vra sy.

Hancox meen dit is goed dat die weermaglid aangekla is, “maar wat my pla, is ná al die kwessies oor die afgelope weke wat die hoofde van die polisie en weermag bevestig het en sou hanteer het, lyk dit of niks daarná gebeur nie”.

Sy vra die volgende vrae: “Waar is die proaktiewe optrede? Is hulle aktief betrokke by hierdie kwessies en word die inligting oorgedra? Is die soldate bewus van die feit dat wanneer hulle saam met die polisie in hierdie situasie werk, hulle aan die bepalings van die polisiewet moet voldoen?”

Lt.kol. Petrus Shilumbu, woordvoerder van die Namibise weermag, wou die skietvoorval by navraag nie bespreek nie. “Hierdie is ‘n gesamentlik operasie met die Namibiese polisie en die voorval word deur die polisie ondersoek. Nader die polisie om kommentaar,” het hy gesê.

AR SE REAKSIE

Mnr. Job Amupanda, van die Regstellende Herposisioneringsbeweging (AR), het gister in ’n mediaverklaring heftig op die voorval gereageer.

“AR neem kennis dat die regime deur die polisie-operasies, wat bedoel is om burgers te terroriseer om hul politieke doelwitte te bereik, ’n burger doodgeskiet het,” het Amupanda gesê.

“Ons pleit lankal saam met baie Namibiërs dat die rol en plek van soldate nie in die strate is nie. Ons is nou in die stadium waar ’n lewe verloor is.

“As soldate in die strate bly, gaan meer lewens verloor word. Ons wil verseker soldate wat opgelei is om dood te maak, word van die strate verwyder,” het Amupanda gesê.

Hy sê die AR beraadslaag met verskeie organisasies wat gewillig is om ’n dringende hofbevel voor die Windhoekse hoërhof te bring.

“As die hof nie na ons luister om ander mense se lewens te red nie, sal ons ander middele vind om die lewens van ons burgers te beskerm.”

Soortgelyk

 

AgriBusDev-baas geskors

1st of June 18:23 | Regering

Mnr. Petrus Uugwanga, die landbousake-ontwikkelingsagentskap (AgriBusDev) se besturende direkteur, is met onmiddelike effek geskors. Die voorsitter van die AgriBusDev-raad, me. Sophia Kasheeta, het pas ‘n...

Twee 'renosterstropers' verskyn in Gobabis-hof

1 uur gelede | Howe

Twee vermeende renosterstropers het vandag in die landdroshof op Gobabis verskyn.Mnre. Alberto Mbwale en Joseph Matheus het op klagte van die onwettige jag van spesiaal...

Pastoor Babi steeds agter tralies

5 ure gelede | Howe

Pastoor Jackson Babi (30) van die House of Joy Ministries en sy medebeskuldigde, mnr. Friza Dumeni (25), bly steeds agter tralies.Landdros Linus Samunzela het vanoggend...

25ste Covid-19-geval bevestig

7 ure gelede | Gesondheid

'n Vroulike gesondheidswerker (32) is Namibië se jongste Covid-19-geval. Dit bring die aantal bevestigde Covid-19-gevalle in Namibië op 25 te staan. Volgens die minister van...

Hof hoor president is 'mislei' oor arbeidsregulasies

17 ure gelede | Howe

Ronelle Rademeyer - Pres. Hage Geingob is “verkeerd geadviseer” met die opstel van die gewraakte arbeidsregulasies waarvan die grondwetlikheid Vrydag in die hoërhof deur Namibiese...

Namibiërs in haglike omstandighede onder SA-kwarantyn

17 ure gelede | Gesondheid

Twee vroue van Windhoek en die een se 16-jarige dogter meen die vervalle staatshospitaal by Nababeep naby Springbok in die Noord-Kaap waar hulle in kwarantyn...

'Profeet' Babi se borgaansoek vandag

17 ure gelede | Misdaad

Francoise Steynberg – Die bekende, charismatiese en selferkende profeet van die House of Joy Ministries, pastoor Jackson Babi (30), en sy medebeskuldigde, mnr. Friza Dumeni,...

Twee bemanningslede positief vir Covid-19

17 ure gelede | Gesondheid

Henriette Lamprecht & Leandrea Louw – Walvisbaai huisves tans drie aktiewe gevalle van Covid-19 ná ‘n 51-jarige man Saterdag positief vir die virussiekte getoets het....

Fishrot-manne skarrel vir borgtog

17 ure gelede | Misdaad

Augetto Graig – Die Windhoek-landdroshof het Vrydag met verskeie Fishrot-sake gewemel, met borgtogaansoeke wat met aansoeke vir die verlenging van tyd vir verdere ondersoek, meegeding...