Openbare vervoertariewe styg met 15%

Augetto Graig – Die Padvervoerraad van Namibië het Maandag ‘n prysverhoging van tot 15% vir taxi’s en busse goedgekeur.Die voorsitter van die raad, mnr. Browny Mutrifa, het gisteroggend bevestig die verhoging is reeds van krag. Die verhoging is ’n finansiële noodmaatreël vir die bedryf, wat net geldig is tot die einde van die nasionale noodtoestand, sê hy. Pres. Hage Geingob het op 17 Maart vanjaar in reaksie tot die uitbreking van Covid-19 ’n noodtoestand in die land afgekondig wat vir ses maande sal duur.Volgens die ministerie van werke en vervoer moet openbare vervoerders streng gesondheidsmaatreëls binne hul voertuie toepas. Die ministerie vra lede van dié bedryf om hul ondersteuning te gee om higiëne in die algemeen te verbeter.Die vervoerminister, mnr. John Mutorwa, het die 15% verhoging ten volle onderskryf.“Ons het in ag geneem die meerderheid Namibiers word ook deur die inperking geraak. Die 15% verligting is min in vergelyking met die 50% vermindering in openbare vervoerders se inkomste weens ’n beperking op die aantal passasiers. Ons het ’n wen-wen situasie tussen bus- en taxi- operateurs en hul kliënte probeer vind en kon nie tot ‘n volle prysverhoging instem nie,” brei Mutrifa uit.Aanvanklik het die Namibië Bus- en Taxivereniging (Nabta) vir ’n 10% verhoging gevra, die Namibië Openbare Passasiersvervoervereniging (NPPTA) vir 12% en private taxi-eienaars vir 33%, volgens die ministerie van werke en vervoer. Die ministerie waarsku diegene wat pryse vra wat nie goedgekeur is nie, veral op die hoof- langafstandroetes, sal vervolg word.Mnr. Werner Januarie, president van die Namibië Vervoer- en Taxivakbond (NTTU), sê egter die 15% verhoging is nie genoeg nie, veral vir langafstandoperateurs. “Op langer afstande maak die 15% verhoging nie ’n verskil nie. Ons moet besigheid doen, ons is nie ’n liefdadigheidsorganisasies nie. Die situasie het ’n ernstige impak op die bedryf. Ons kan nie teen ’n verlies sake doen nie,” sê hy. Volgens Januarie het hy al verlede week langafstand-minibuseienaars geraadpleeg, en dié week konsulteer hy met eienaars van sewesitplektaxi’s om meer vir die vervoer van bagasie te vra, en sodoende verliese op te maak. ’n Pendelaar wat daagliks tussen Windhoek en Okahandja reis sê: “Ons betaal N$1 250 per maand en as dit met 15% verhoog word, moet ons dit net aanvaar. Ek het geen probleem daarmee nie; dit is deel van die stelsel. Ons ekonomie is ontwerp om ons te vernietig. Daar is geen rede om te kla nie, ons maak die beste van die saak,” sê mnr. Lorean de Vries.So ver dit die stedelike taxigebruiker betref, sê Januarie, moet hulle gereed wees om ten minste N$14 per rit te betaal. Alhoewel die verhoging amptelik net tot N$13,80 vanaf N$12 goedgekeur is, en dit onwettig is om meer as 15% bo die oorspronklike prys te vra, sê Januarie die praktyk is om na die naaste dollar af te rond. “Dit is net makliker om met ’n dollar te werk, anders benodig ons almal klomp los sente,” sê hy.’n Plaaslike taxigebruiker, mnr. Joef Naluwe, sê: “Ek dink dit is regverdig. Dit is mos net vir die Covid-19-tydperk. Die beperking op die aantal passasiers, afhangend van die kapasiteit van die betrokke voertuig, beteken klaar ’n verlaging in taxibestuurders se daaglikse inkomste. Hulle maak staat op daardie inkomste. Ek dink met die petrolprys wat verlaag het, maak dit hul situasie ’n bietjie makliker,” sê hy.Windhoek se munisipale busgebruikers sal nog moet wag en sien hoe hierdie verwikkeling hulle gaan beïnvloed. Die woordvoerder van die munisipaliteit, me. Lydia Amutenya, sê: “Ons het nog nie ’n besluit oor bustariewe geneem nie. As ons besluit om bustariewe te verhoog, sal die publiek dienooreenkomstig ingelig word. Vir nou bly bustariewe dieselfde.”Die hoofstad vra tans N$7 per busrit vir passasiers met ’n buskaartjie en N$8 as kontant betaal word. - augetto@republikein.com.na

Openbare vervoertariewe styg met 15%

Kommentaar

Republikein 2026-05-05

Meld asseblief aan om kommentaar te lewer

Openbare vervoertariewe styg met 15%

Kommentaar

Republikein 2026-05-05

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.