Oorvol, vuil, vervalle

Henriette Lamprecht - Verstopte toilette en storte, ligte wat nie werk nie en aangehoudenes wat noodgedwonge in ontspanningsareas moet slaap omdat aanhoudingselle reeds uit hul nate bars. Dít is van die skokbevindinge in ’n verslag deur die kantoor van die ombudsman wat die toestande in aanhoudingselle oor die hele land ondersoek het. Volgens die verslag huisves die selle by die Katutura-polisiekantore, wat as “swak, oud en oorvol” beskryf word, byna dubbel soveel aangehoudenes as die 130 waarvoor daar voorsiening gemaak is. Hier is die grootste frustrasie volgens die aangehoudenes ’n gebrek aan besoekersgeriewe, terwyl hulle voorts ook nie vir mediese ondersoeke hospitaal toe geneem word nie. Ook op Rundu is die aanhoudingselle oorvol en in ’n haglike toestand. Dit het plek vir 60, maar 86 word daar aangehou. Op Outapi was die aangehoudenes aangewese op emmers water om toilette te spoel wat buite werking is. Hier was 77 aangehoudenes teenoor die 60 waarvoor daar plek is. Geen lopende water, elektrisiteit of middagetes en oorvol selle wat 102 verhoorafwagtendes pleks van die aanbevole 60 huisves. Dit was die prentjie by die Okahao-polisiekantoor waar sommige nie lopende water gehad nie, met water wat deur die loop van die dag voorsien is deur ’n pyp wat aan ’n buitekraan gekoppel is. Ander selle het danksy foutiewe gloeilampe geen elektrisiteit gehad nie. Klagtes van aangehoudenes was dat hulle nie middagetes ontvang nie en daarom nie hul anti-retrovirale medikasie (ARV’s) op ’n leë maag kon neem nie. Die stasiebevelvoerder het gekla “vereistes vir kos” word dikwels nie betyds goedgekeur nie en soms is daar ook nie genoeg voorraad nie. Ook op Katima Mulilo was die algemene toestande van aanhoudingselle “onbevredigend” met 112 aangehoudenes wat in selle sit wat slegs plek vir 60 het. Die nuwe polisiekantore op Ngoma se mure word deur die hoë soutinhoud in die grond weggevreet, met die sout wat die gebou se mure, waterpype en elektriese kabels binnedring. Ook hier het toilette nie gewerk nie en moes aangehoudenes met emmers water toilette spoel. Aanhoudingselle op Noordoewer was in ’n “slegte toestand” en word nie deurgaans skoongehou nie, met dieselfde prentjie wat vir die Aroab-polisiekantore geskets word. By laasgenoemde was nuwe aanhoudingselle in aanbou, maar is konstruksie om die een of ander rede gestaak. Aangehoudenes het gekla dat hulle nie hul voorgeskrewe medisyne ontvang nie. By die Dordabis-polisiekantore was die selle in ’n “algemeen aanvaarbare toestand”, maar is gekla oor ’n gebrek aan “badseep” en die polisie se “onvermoë” om siek aangehoudenes betyds by die kliniek te kry. Selle op Opuwo is oorvol, danksy arrestasies op onder meer Onganguati en Epupa wat geen aanhoudingselle het nie. Op Sesfontein word mense wat gearresteer is, aangehou in ’n “vuil, ongeskikte kantoor” voordat hulle na Opuwo vervoer word. By die Trans-Kalahari-polisiekantore was sommige aangehoudenes in die oorvol selle genoodsaak om in die ontspanningsarea met ’n gaasdak daaroor te slaap. Nóg die toilette nóg die ligte het gewerk. Op Gobabis het aangehoudenes vuur in hulle selle gemaak om “warm te bly”, terwyl twee selle op Witvlei weens geblokte toilette en storte nie gebruik kon word nie. Van die aangehoudenes moes noodgedwonge buite in die ontspanningsarea slaap. By die Kamenga-grenspos (foto’s bo) bly polisiebeamptes in “haglike omstandighede” en kry water van die Kongola-polisiekantore. Daag die water laat op, moet die beamptes noodgedwonge hul dors by strome les.

Oorvol, vuil, vervalle

Kommentaar

Republikein 2025-12-17

Meld asseblief aan om kommentaar te lewer

Oorvol, vuil, vervalle

Kommentaar

Republikein 2025-12-17

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.