Oornag ’n internetsensasie

17 February 2017 | Plaaslik
Yochanaan Coetzee - Ná ’n lang, harde dag se werk met ratkaste en enjins het ’n jong man van Okahandja ’n held en sosiale mediasensasie geword, ná die verspreiding van ’n video van hoe hy twee berugte misdadigers in Windhoek se strate op hul plek sit.
Die opname, wat teen gistermiddag reeds meer as 330 000 gekyk is, wys die dramatiese uitkoms nadat die 30-jarige Stefan Mans en sy kollegas JF van Eeden en Horst Hans drie boewe vasgekeer het nadat hulle toegang verkry het tot ’n kliënt se voertuig – terwyl sy in die bestuurdersitplek was.
Mev. Hannelie Koen-Rossouw het Woensdag omstreeks 16:00 vlugtig by haar motorhandelaar stilgehou vir advies oor ’n kleinerige probleem met haar motor. Skielik het drie mans na bewering glo haar agterdeur oopgemaak en daarna die bestuurder se deur.
’n Geskokte werknemer van die motorhandelaar het geskree toe sy dit sien gebeur. Dit het die aandag van haar kollegas getrek en die mans het dus weggehardloop toe hulle mense uit die gebou sien kom.
Van Eeden vertel hy het pas in sy kantoor gekom, toe hy sien sy foon lui aanhoudend. “My kollega het aangehardloop gekom en iets gesê van, ‘die mans’. Al wat ek kon uitmaak, was ‘kom, ons moet vir Stefan gaan ondersteun’.”
Toe Mans van die voorval hoor, het hy agter die mans aan gery, totdat hy te voet verder moes gaan toe die verdagtes oor ’n treinspoor verder af in die straat ontvlug het.
“Wat my die meeste verbaas het, was dat hulle net ’n kort entjie gehardloop het en van daar af kalm gestap, grappies gemaak en kardeure se handvatsels probeer oopmaak het soos hulle gestap het,” sê Mans. Hy het die polisie probeer bel terwyl hy hulle agtervolg het.
Sy kollegas, Van Eeden en Hans, het vooruit gery om die manne vas te keer. Dié ontmoeting het voor ’n meubelwinkel in die Suidelike Nywerheidsgebied gebeur.
“Aanvanklik was die ouens kalm, maar toe ons weier om hulle te laat wegkom voordat die polisie opdaag, het die situasie baie gou gespanne geraak,” het Hans vertel.
Hier is waar die video begin (wat ook op ons webwerf gesien kan word). Die ouer verdagte en Mans kan gesien word waar hulle handgemeen raak. ’n Tweede man kom by wat dreig om met ’n skerp voorwerp in te klim en hardloop na ’n vullisdrom om ’n glasbottel te vind. Van Eeden het die tweede man gegryp en die bottel uit sy hande gekry, terwyl Mans en die ouer man houe na mekaar mik.
Terselfdertyd is Hans agter die derde man aan, maar die jong man het in die geharwar weggeglip.
Van Eeden sê: “Toe die een wat ek gehad het, loskom en vir Stefan aanval, toe sê Stefan net hy sal dit hanteer. En hy het toe wragtig.”
Kalm en berekend, met vernuftige voetwerk en ’n venynige linkerhaakhou, het Mans die twee mans op ’n afstand gehou.
Die voorval het glo nog lank nadat die video eindig, aangehou. Die twee groepe asook ’n groot groep omstanders het saam beweeg en van tyd tot tyd gebots namate die twee misdadigers met bottels en bakstene hul pad probeer oopveg het om in ’n nabygeleë rivierloop te ontsnap.
Mans sê: “Wat baie aanmoedigend was, was hoe die mense wat daar was vir die ouens gesê het as hulle ’n baksteen gooi of iemand met ’n bottel steek, sal hulle met die massa te doen kry.
“Dit was ’n stryd en totaal uitputtend, maar gelukkig het ’n polisieman ons gevind en bystand van die spesiale veldmag se kantoor gekry.”
Die twee verdagtes is in hegtenis geneem, maar is glo later vrygelaat omdat geen klag teen hulle ingedien is nie. Dit word beweer dat Rossouw te skok was deur die voorval om die klag daai tyd te maak, maar Republikein kan bevestig dat ’n klag wel gister teen die mans ingedien is.
Toe Mans gevra is of hy bang was tydens die insident, het hy laggend geantwoord: “Ja, maar meer oor wat my vrou en my baas sou sê.
“Gelukkig was my baas in sy skik dat ons ingegryp het om ’n kliënt te beskerm. Sedert die openbare reaksie is my vrou ook verlig dat soveel mense oral in die land hierdeur bymekaar gebring is en dat die voorval nie erger handuit geruk het nie.
“Dis nie net omdat dit ons kliënt was nie, maar ek moet sê dat wanneer jy by ons koop, is jou vuiligheid in die warranty ingesluit.”
As lid van die Okahandja buurtwag en ’n polisiereservis in opleiding, is Mans se verbintenis tot sy medemens in woord en daad duidelik. “Ons moet saamstaan, betrokke raak en nie net toekyk hoe misdaad gebeur nie.”
Oor beweringe dat die mans hom gedreig het, sê Mans hy staan by sy optrede en sal nie vir misdadigers terugstaan nie.
“Maar soos ek nou lyfseer voel, moet hulle my omtrent ’n week gee, dan kan ons weer probeer,” sê hy met ’n glimlag.

Soortgelyk

 

Namibië: Jerusalem hoofstad van Israel én Palestina

3 dae gelede | Internasionaal

Die regering sê in ‘n verklaring hy het om groot kommer kennis geneem van die die VSA se aankondiging dat hy Jerusalem as hoofstad van...

Rynand Mudge herstel ou geboue

3 dae gelede | Omgewing

Augetto Graig Windhoek se geskiedenis het sedert 1910 en 1913 voor die historiese Gathemann- en Erkrath-gebou in die stad se hoofstraat afgespeel. Die geboue, wat...

EU-lys g'n 'swartlys'

3 dae gelede | Internasionaal

Ronelle Rademeyer “Die EU het Namibië nog nooit as 'n belasting­toevlugsoord beskou nie. Dit is 'n totale misverstand.”Só het die Europese Unie se ambassa­deur in...

Raad vir jong ondernemers

3 dae gelede | Onderwys

‘n Gids oor volhoubare ontwikkeling vir jong ondernemers in Namibië verskyn vandag in Namibia Media Holdings (NMH) se dagblaaie en is gister amptelik bekend gestel.Die...

Kalender 8 Desember

3 dae gelede | Kuns en vermaak

Nou aan die gang» Wees deel van die eerste weergawe StArt Art Salon vandag by die Macadam-mark. StArt Salon Volume 1 is ’n “salon-styl”-utstalling wat...

Weer vir 7 Desember

3 dae gelede | Weer

BINNELAND: Gedeeltelik bewolk en bloedig warm in die verre oostelike gedeeltes, andersins gedeeltelik bewolk en baie warm met 'n paar tot geïsoleerde donderbuie maar verspreide...

Crimson House en Andra deel verhoog by kus

3 dae gelede | Kuns en vermaak

Die Suid-Afrikaanse groep Crimson House bring hul Gypsy Jungle-vertoning oor die feestyd na Swakopmund. Crimson house sal saam met sangsensasie Andra van 19 tot 22...

Een stem, ’n kitaar en baie Stone-emosie

3 dae gelede | Kuns en vermaak

Die Warehouse-teater is dié plek vir kultuur, vermaaklikheid, yskoue bier en pizza in Windhoek. Hierdie gewilde landmerk het onlangs sy 5de verjaardag gevier sedert dit...

Bekendstelling van StArt Salon uitstalling by Macadam-mark

3 dae gelede | Kuns en vermaak

Wees deel van die bekendstelling van die eerste volume van StArt Salon vanaand by die Macadam-mark. StArt Salon Volume 1 is ’n “salon-styl”-utstalling wat die...