Oord ná vyf jaar dalk weer oop

Tanja BauseNá meer as vyf jaar sal die oord by die Hardapdam buite Mariental na verwagting voor die einde van die jaar weer vir die publiek open.Namibia Wildlife Resorts (NWR) het die oord in Junie 2010 vir herstel- en opgraderingswerk gesluit. Aanvanklik sou dié werk net 18 maande duur voordat die oord langs die grootste dam in Namibië weer vir die publiek toeganklik sou wees. Die eerste paar maande na die sluiting het daar egter nie veel werk plaasgevind nie en die geboue het meer en meer verwaarloos geraak.“As mens die omvang van die projek in ag neem, was die oord nie te lank gesluit nie,” het NWR se woordvoerder, mnr. Mufaro Nesongano, aanvanklik op navraag gesê. “Ons beplan om te heropen in die tydperk wat ons vir onsself gestel het.”Volgens aanvanklike beramings sou die oord einde 2014 geopen het, maar dit is tot ’n later datum uitgestel. Volgens NWR behoort dit nou op 1 Desember 2015 – ná meer as vyf jaar – te open.Op verdere navraag het Nesongano gesê daar was talle vertragings buite NWR se beheer. “Dit is hoekom ons nie na 18 maande of vroeg in 2015 kon open nie. Maar ons maak nou reg om op 1 Desember vir die publiek te open,” het hy gesê. Op die oomblik is toegang tot die oord vir Namibiërs N$10 per persoon en N$10 per voertuig. Die park is nie gesluit nie en besoekers kan die dam besoek en daar hengel. Intussen is NWR nog besig om oornagkoste te finaliseer en is bedrae nog nie beskikbaar nie. “Weens ’n ooreenkoms tussen NWR en die kontrakteurs kan ons nie die koste van die opknappingswerk bekend maak nie,” het Nesongano geantwoord op ’n vraag oor hoeveel die werk gekos het.Intussen lyk dinge goed by die oord.“Ons het die swembad volgemaak en is besig om die pompe te toets om te verseker dat alles gereed is vir wanneer ons open,” het ’n werker van NWR gesê. “Dit het nie sin gemaak om die swembad lank voor die tyd vol te maak nie.” Volgens hom is al die meubels vir die restaurant en kamers alreeds by die oord en sou dit verlede week uitgeplaas word. Die oord spog nou met vyf VIP bungalows, 15 gesin-chalets en 30 bos-chalets. Talle kampeer- en karavaanplekke is ook beskikbaar wat elkeen oor sy eie kragpunt beskik. Die gesin-chalets is selfversorgend. Daar is ook vier blokke met kamers vir mans en vroue waarin 10 mense per blok kan oornag.In die verlede het die oord oor 30 bos-chalets, 16 gewone chalets met vier beddens elk, en vier familie-eenhede beskik.Daar is ook ’n moderne restaurant met ’n uitsig oor die dam. Die swembad is neffens die restaurant geleë. Ook die kantore is opgeknap. Die dam is elke jaar die gasheer vir nasionale klub- en twee internasionale hengelkampioenskappe, met hengelaars uit eie bodem, Zimbabwe en Suid-Afrika wat daaraan deelneem.“Die oord is nou al so lank gesluit en ons is nou al so gewoond daaraan om op die dorp te bly en om elke dag uit te ry om te gaan hengel. Ons sal maar moet sien wanneer dit oop is, wat die nuwe tariewe is en of dit vir ons die moeite werd gaan wees om daar te bly. Dit hang alles van hul tariewe en geriewe af,” het ’n hengelaar gesê.

Oord ná vyf jaar dalk weer oop

Kommentaar

Republikein 2025-05-09

Meld asseblief aan om kommentaar te lewer

Oord ná vyf jaar dalk weer oop

Kommentaar

Republikein 2025-05-09

Meld asseblief aan om kommentaar te lewer

MELD AAN

Advertensie