Oor dié motors kla SA die minste, meeste

Ferdi de Vos – Baie mense wat ’n Datsun Go Plus gekoop het, berou dit blykbaar – kopers meld die meeste foute (147 per 100 motors wat verkoop word) met dié voertuig aan van alle passasiersmotors.Die minste klagtes is vir die ingevoerde Opel Adam – net 23 klagtes per 100 voertuie wat verkoop is. Die jongste Ipsos-opname oor voertuiggehalte, ook bekend as VQS, is goeie nuus vir die twee plaaslike voorverkoper-vervaardigers Toyota en Volkswagen.Die 2017-verslag, gegrond op ’n opname wat verlede jaar onder 7 000 voertuigeienaars en voertuie van 16 verskillende vervaardigers gedoen is, toon ook ’n geringe verbetering op die syfers van 2016.Gebruikers het gemiddeld 69 defekte per 100 voertuie aangemeld teenoor 73 in 2016 en 81 in 2015.Die vervaardigers verteenwoordig sowat 70% van die plaaslike motormark.Ook interessant is die bevinding dat plaaslik vervaardigde passasiersvoertuie ’n laer foutsyfer per 100 voertuie (66) as ingevoerde voertuie (72) het, terwyl plaaslik vervaardige ligte handelsvoertuie (LHV’s) se foutpunt net een hoër (76) is as ingevoerde LHV’s se telling (75).Wat ontwerpfoute (soos verbruikers-onvriendelike toerusting of moeilik manipuleerbare inligtingstelsels) betref, het plaaslik vervaardigde passasiersmodelle ’n hoër foutpunt (43) as ingevoerde rygoed (36) gekry – waarskynlik omdat die plaaslike modelle in die algemeen goedkoper en eenvoudiger as ingevoerde voertuie is. Die punteverskille in die LHV en sportnutsklasse was negeerbaar klein.Ander interessante waarnemings is dat goeie brandstofverbruik al hoe belangriker vir verbruikers word, soos aangetoon deur ’n merkbare toename in klagtes hieroor.Verbruikers kla ook oor die swak kraglewering van intreevlakmotors – vermoedelik ’n uitvloeisel van die hedendaagse neiging onder vervaardigers om kleiner enjins in hul rygoed te gebruik.Groot name soos BMW, Mercedes-Benz, Hyundai, Kia, Jaguar Land Rover, Fiat-Chrysler en Suzuki was nié deel van die opname nie, en hul deelname sou moontlik ’n verskil in sommige van die uitslae kon maak.Toyota oorheersToyota het 13 goue pryse uit die 16 kategorieë in die Ipsos-opname gewen. Sewe daarvan was in die passasiersmark en ses vir ligte handelsvoertuie.Volkswagen het agt goue pryse gewen: ses vir passasiersmotors en twee vir ligte handelsvoertuie.Wat Toyota se vertoning nog merkwaardiger maak, is dat die vervaardiger vier méér goue pryse as in die 2016-opname ontvang het, terwyl VW sy getal pryse verdubbel het (vanaf vier in die vorige opname).Boonop het albei reuse ook goud vir hul plaaslike voertuigaanlegte gekry.Die ander ontvanger van goue pryse vir die 2017-opname (met hul 2016-uitslae in hakies) is Audi met vyf (vyf); Isuzu met drie (nul); Honda met drie (nul); Nissan met twee (agt); Opel met twee (een); en Ford met twee (twee).Audi het ook goud vir die beste passasiersmotorvervaardiger gekry, danksy die beste gesamentlike punt vir al sy modelle, met Toyota, Opel, Nissan en Ford wat goud deel in die kategorie vir beste volume-passasiersmotorvervaardiger.Waar twee of meer voertuie of vervaardigers feitlik dieselfde uitslae behaal het, is meer as een goue prys uitgeloof. Hiervolgens spog Toyota met sewe goue pryse in die passasiersmotorskategorie, VW en Audi met vyf elk, Honda met drie, Opel met twee en Ford en Nissan met een elk.Die beste passasiersmotors wat betref die minste foute per 100 voertuie was almal ingevoerde modelle: die Opel Adam-luikrug met 23, gevolg deur die Honda Civic-sedan (31) en die Audi A3-sedan (32).Ander kategorie-wennersOok onder ligte handelsvoertuie het Toyota koning gekraai met ses goues, teenoor drie vir VW en Isuzu, en een elk vir Ford en Nissan (Nissan het in die 2016-opname vyf goue pryse gekry).Toyota en VW is as die beste vervaardigers algeheel in die klas vir ligte handelsvoertuie aangewys, en Toyota het ’n verdere goue prys vir die beste LHV-aanleg (in Prospecton, Durban) ingeoes.Toyota se plaaslik vervaardige Hilux-enkelkajuit-petrol-bakkie het die beste in die LHV-mark gevaar wat foute per 100 voertuie betref, met ’n telling van 30, gevolg deur die Isuzu KB ekstra-kajuit (56) en die VW Amarok-dubbelkajuit dieselbakkie (69).Die ingevoerde VW Touareg (2017-model) het die beste in die sportnutsmark (en algeheel) gevaar, met ’n telling van net 10, gevolg deur nog twee ingevoerde modelle, die Toyota RAV4 (33) en Volvo XC60(36).Patrick Busschau, voertuigopname-direkteur van Ipsos, het al die deelnemende vervaardigers gelukgewens met hul konstante pogings om beter produkte aan verbruikers te verskaf. “Die uitslae van veral die goue pryswenners dui duidelik daarop dat hul voortgesette fokus op gehalte ook vrugte afwerp wat markverkope betref.” – Netwerk24

Oor dié motors kla SA die minste, meeste

Kommentaar

Republikein 2025-12-16

Meld asseblief aan om kommentaar te lewer

Oor dié motors kla SA die minste, meeste

Kommentaar

Republikein 2025-12-16

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.