Oop grense vir toeriste in die kollig

Francoise Steynberg – Verskeie rolspelers in die toerismesektor is besig met strategiese besprekings om Namibië se grense vir toeriste oop te stel. Die woordvoerder van die ministerie van die omgewing, bosbou en toerisme, mnr. Romeo Muyunda, het gister aan Republikein bevestig strategiese besprekings tussen rolspelers in die toerismebedryf duur voort oor die besonderhede om die grense vir toeriste oop te stel. “’n Balans moet gevind word tussen die ekonomiese herlewing van die toerismebedryf sonder dat dit ’n gesondheidsrisiko vir toeriste en Namibiërs inhou,” het Muyunda gesê. “Daarom word gefokus op lande wat ’n laer risiko het en die fyner besonderhede soos die tydperk van kwarantyn vir buitelandse toeriste.”Dit volg ná Maandag se aankondiging dat die regering in samewerking met die toerisme- en gasvryheidsbedryf 'n geteikende herlewingsinisiatief vir internasionale toerisme tussen 15 Julie en 15 Augustus gaan uitvoer. Volgens die Covid-19-regulasies is alle Namibiërs en buitelanders wat die land binnekom, onderhewig aan 'n Covid-19-toets en verpligte kwarantyn op eie onkoste. Een van die kwessies is die tydperk van kwarantyn vir toeriste. Die direkteur van toerisme, mnr. Sem Shikongo, het Woensdagaand tydens ’n paneelbespreking op die nasionale uitsaaier NBC gesê geen toeris wil tydens sy vakansie 14 dae in kwarantyn bestee nie. “Ons moet berekenend wees oor die risiko om ons mense se gesondheid te beskerm, maar ons het toeriste nodig om werksgeleenthede en inkomste te skep,” het hy gesê.MINISTER SHIFETATydens ’n eksklusiewe onderhoud vandeesweek met Frank Steffen van Tourismus Namibia, het die toerismeminister, mnr. Pohamba Shifeta, gesê ’n dringende oplossing moet gevind word. “As toeriste van ’n land is wat Covid-19-vry is, sal ons maniere moet vind vir hulle om die land binne te kom sonder die 14 dae kwarantyn. Die besonderhede is nog nie gefinaliseer nie, maar Duitsland is een van die lande waarna gekyk word,” het hy gesê. Die volledige onderhoud kan Saterdagoggend op die Facebook-blad van Namibia Tourism Expo (NTE) gekyk word.Die uitvoerende hoof van die Namibië Toerismeraad (NTB), mnr. Digu //Naobeb, het gesê Namibië moet die toetslopie slaag, want as grense oopmaak en dit loop op ’n fiasko uit, sal die land se beeld skade ly. //Noabeb sê ook toeriste van lae risiko-lande sal slegs via direkte vlugte Namibië kan binnekom.FENATADie voorsitter van die Namibiese Federasie van Toerismeverenigings (Fenata), mnr. Bernd Schneider, het gister aan Republikein gesê daar is steeds baie faktore waaroor duidelikheid gekry moet word. “Oor die algemeen is dit verblydend om te sien die regering is op die pad om grense geleidelike oop te maak wat noodsaaklik is vir enige kans van oorlewing vir die bedryf,” het hy gesê. “Die mandaat is om toeriste veilig, sonder enige gesondheidsrisiko vir Namibiërs in te bring en die toerismebedryf ’n kans te gee om weer op die been te kom.” Tóg het Schneider tydens die paneelbespreking gesê: “Met te veel reëls en regulasies sal buitelandse toeriste belangstelling verloor om die land te besoek.” - francoise@republikein.com.na

Oop grense vir toeriste in die kollig

Kommentaar

Republikein 2025-12-24

Meld asseblief aan om kommentaar te lewer

Oop grense vir toeriste in die kollig

Kommentaar

Republikein 2025-12-24

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.