Onwettige skole se deure moet toe

Wetsgehoorsame burger skryf:

Agbare me. Katrina Hanse-Himarwa, minister van onderwys, kuns en kultuur

Weet u hoeveel ongeregistreerde skole (dus, onwettig) in hierdie land opereer onder die naam van Privaatskool, “Home School”, Leersentrum, ens.?

Weet u dat die permanente sekretaris en streeksdirekteure bewus is van hierdie skole en hulle ooglopend toelaat om te opereer, en in sekere gevalle selfs grasie vir registrasie verleen? ''n Voorbeeld hiervan is die skool wat van naam verander soos ''n verkleurmannetjie van kleur: Kinderparadys, Pionierspark Educational Centre, Educare Primary School, Educare Secondary School. Dan word daar ''n nuwe naam van Edunam gebruik, wat blykbaar ''n oorkoepelende organisasie vir Educare en Prestantia College in Okahandja is.

Hierdie skool is al drie jaar aan die gang en word ooglopend toegelaat om te opereer.

Agbare Minister, die wet bepaal baie duidelik dat ''n instansie alleenlik sy deure mag oopmaak en funksioneer as ''n skool (staat sowel as privaat) aan sekere vereistes voldoen en u ministerie ''n registrasiesertifikaat daaraan uitgereik het. Windhoek Gimnasium is ''n voorbeeld van ''n nuwe skool waar die regte prosedures gevolg is.

Dus, die minister, permanente sekretaris en streeksdirekteure word deur die wet verplig om enige instansie waarvan julle bewus word en wat skoolkurrikula, soos deur die wet bepaal, onwettig onderrig, summier toe te maak. Waarom word dan gesloer om dit te doen?

U permanente sekretaris het in ''n onderhoud met die NBC genoem dat die ministerie bewus is van twee onwettige skole, Educare en nog een in die Noorde van die land, en dat hierdie skole se rapporte nie aanvaar sal word nie. Deur bewustelik onwettige en ongeregistreerde skole toe te laat om te opereer, beteken dit dat u ministerie dit goedkeur. Wat sal die eerste minister en president Hage Geingob hiervan sê?

Skooleienaars/-besture draai (niksvermoedende) ouers die rat voor die oë deur hulle te vertel dat hul skool se aansoek vir registrasie ingedien is en dat hulle magtiging het om voort te gaan, of dat hulle registrasie voorlopig goedgekeur is en dat hulle wag vir die sertifikaat. Hierdeur word ouers uitgelok om met ''n onwettige instansie sake te doen.

Dan het, blykbaar ''n ou truuk, aan die lig gekom. Rapporte van skole wat die Suid-Afrikaanse onderwysstelsel aanbied (by ons bekend as IEB-skole) word na bewering deur van hierdie skole vervals om leerders by ''n Suid-Afrikaanse “Home Schooling”-instansie te registreer, om studie- en assesseringsmateriaal te bekom. Hierdie “Home Schooling”-instansie aanvaar die rapporte in goeder trou, komende van ''n skool, nee: instansies wat in ons land opereer, maar die naam skool nie werd is nie.

Wat word van die honderde leerders indien hierdie skole gesluit word? Sommige het alreeds leerders vir volgende jaar geregistreer en gelde ontvang? Ek weet nie wat u gaan doen nie, Minister, ek beveel egter aan dat die ouers saamstaan en hierdie skole se eienaars/bestuurders hof toe sleep om verantwoording te doen vir hul dade. Maak ''n voorbeeld van hulle sodat ons hierdie ooglopende uitbuiting van ouers vir eens en altyd kan uitroei.