Ontwikkelingsbrigade spook nog voort

Augetto GraigDie destydse Development Brigade Corporation (DBC) bestaan steeds as entiteit ondanks die feit dat die onderneming reeds meer as ’n dekade gelede gesluit moes gewees het.Miljoene dollar is afgeskryf en die DBC word deur ’n waarnemende direksie bedryf wat oor geen wetlike mandaat beskik nie.Die werksaamhede van die DBC was Donderdag onder die vergrootglas van die vaste komitee vir openbare rekeninge nadat die ouditeur-generaal, mnr. Junias Kandjeke, in Desember opnuut verskeie gebreke in die finansiële state van hierdie staatsonderneming uitgewys het.In sy verslag vir die jare van 2005 tot 2013, gebaseer op ’n oudit wat PKF Namibia vir sy kantoor gedoen het, wys Kandjeke op die gebrek aan gekonsolideerde statae vir DBC se filiale Namibia Brick Enterprises en Star Protection Services. Bates ter waarde van meer as N$20,5 miljoen is nie van die 2004-balansstaat oorgedra nie en daar was fout met baie van die syfers.Die filiale M & N Developments, Namibia Pioneer Engineering en Patriot Construction Company verskyn glad nie in die state nie, hoewel al vyf filiale in die vorige finansiële verslag altesaam meer as N$14,2 miljoen werd was. Boonop het die DBC nie finansiële state aan die ouditeur-generaal of die minister oorhandig soos die wet bepaal nie.Mnr. Mike Kavekotora, voorsitter van die komitee, moes lank wag om van die DBC se waarnemende direksievoorsitter, mnr. Munu Kuyonisa, te hoor waarom die DBC steeds bestaan nadat hy en sy span in 2001 reeds aangestel is om die onderneming te sluit. Hoewel die laaste bates in 2013 aan die Nasionale Jeugdiens oorhandig is, moet die parlement nuwe wetgewing aanvaar om die DBC finaal toe te maak, het Kuyonisa uiteindelik verduidelik.Die DBC het steeds ’n bankrekening wat rente verdien. Kuyonisa wou nie sê hoeveel geld in die rekening is nie, maar Kandjeke se verslag dui op ’n bedrag van meer as N$5 miljoen.Die meeste DBC-filiale is aan die ministerie vir veteranesake oorhandig as lopende ondernemings, insluitende hul hoenderbesigheid, Namibia Brick Enterprises en Star Protection Services. Die DBC se landbou-afdeling en sy eiendom op Berg Aukas is aan die Nasionale Jeugdiens oorhandig.Volgens die DBC se finansiële konsultant, mnr. André Smith, kon bates nie gelys word nie omdat geen rekords bestaan het nie. “Geen formele bestuur het by die besighede bestaan nie, en die vorige raad het niks aan die waarnemende direksie oorhandig nie. Daar was niks om te oorhandig nie. Daar was net niks nie,” het hy gesê.Kuyonisa het bygevoeg dat die 2004-balansstaat lankal ’n brandpunt was. “Toe ons die opdrag kry, het ons die ouditeur-generaal genader vir bewyse van die bedrae in die vorige balansstaat, en hulle het ons na die vorige ouditeure, BDO, verwys, maar hulle het ook niks gehad nie. Ons was huiwerig om die bedrae oor te dra sonder die bewyse omdat iemand ons eendag sou vra waar die bates is. Ons het toe self die besighede besoek, opnames gedoen, en die nuwe balanse ingevoeg,” het hy gesê.Tog is daar geen bewyse daarvan in Kandjeke se nuutste verslag nie. Smith het gesê hy kan die komitee van bewyse verskaf.“Regsgesproke dink ek nie ons was die regte span vir die taak nie. Die wet maak geen voorsiening vir ’n waarnemende direksie nie,” het Kuyonisa aan die komitee gesê.Hierdie regsmening is in 2005 deur staatsprokureurs verskaf, maar volgens Kuyonisa het die destydse eerste minister, mnr. Nahas Angula, die direksie beopdrag om voort te gaan tot verdere kennis. Geen kennisgewing is daarna ontvang nie.Kavekotora het gevra dat alle uitstaande bewyse aan die komitee verskaf word. Die komitee sal getuies herroep sodra dit gedoen is.

Ontwikkelingsbrigade spook nog voort

Kommentaar

Republikein 2026-06-23

Meld asseblief aan om kommentaar te lewer

Ontwikkelingsbrigade spook nog voort

Kommentaar

Republikein 2026-06-23

Meld asseblief aan om kommentaar te lewer

Intekening vereis om toegang tot inhoud te kry. ×

MELD AAN

Advertensie

Intekening vereis om toegang tot inhoud te kry.