Ontbloot 'vrot appels'
'n Gebrek aan empatie en onverskilligheid in openbare gesondheid het professionaliteit vervang, sê die minister.
Henriette Lamprecht
Die hepatitis E-uitbreking het gewys die ministerie van gesondheid en maatskaplike dienste (MoHSS) is nie op noodgevalle voorbereid nie.
Volgens dr. Kalumbi Shangula, minister van gesondheid en maatskaplike dienste, het dít tot die ministerie se onvermoë gelei om 'n voorbeeld as vertrekpunt te vestig.
“As sodanig kan ons nie vasstel of die hepatitis E-virus se oorsaak endogeen of eksogeen is nie, omdat ons stelsels nie reageer en sensitief genoeg is om daardie vraag te beantwoord nie.”
Hoewel vooruitgang gemaak is, is die feit dat die uitbreking voortduur en moontlik endemies in Namibië kan word, 'n wekroep tot aksie, het Shangula gemaan.
“Die sluimerende apatie van die publiek teenoor die siekte is vreesaanjaend.”
Verskeie klagtes van die publiek oor die ministerie se dienslewering is volgens Shangula nóg rede tot kommer.
“'n Gebrek aan empatie en onverskilligheid het professionaliteit vervang.”
Volgens hom sal meganismes ingestel word om “vrot appels” te ontbloot, wat dit sal moeilik maak om onder die “goeies” te skuil.
“Waarom moet toegewyde gesondheidslui se integriteit weens 'n onsigbare oortreder bevraagteken word?”
Die minister het gesê beperkte opleidingsgeleenthede in die land het veroorsaak dat baie studente in die buiteland opgelei is.
Met hul terugkeer het die gegradueerdes volgens die minister gesukkel om weens 'n gebrek aan noodsaaklike vaardighede ten volle in die Namibiese gesondheidstelsel geïntegreer te word.
In die lig hiervan het die kabinet 'n remediërende program onder die vaandel van MoHSS gevestig, wat ontwerp is om dié gaping te oorbrug.
Uitdagings met die program is dat dit volgens Shangula nie “op enige maniere gestruktureer” is nie.
“Dit is aan die betrokke departemente se vindingrykheid oorgelaat.”
Die probleem is vererger deur die groot aantal buitelandse gegradueerdes wat nog meer druk op die reeds oorlaaide gesondheidstelsel geplaas het.
In die lig hiervan het MoHSS, die Universiteit van Namibië (Unam) en die Raad vir Gesondheidsberoepe in Namibië (HPCNA) 'n taakspan vir die remediërende program saamgestel. Die doel van die taakspan is om die program in sy huidige vorm te ondersoek en voorstelle vir beter strukturering te maak.
Met verwysing na die verkryging, verspreiding en uitdeel van medisyne in die openbare gesondheidsbedryf sê Shangula dit is vol logistieke uitdagings.
Volgens hom is dit omdat daar te veel rolspelers in die verskaffingsketting is.
Dít kan egter oorkom word as elkeen sy deel doen, sê Shangula.
Hy het verwys na onlangse tekorte aan gesondheidskaarte by openbare gesondheidsgeriewe en dat pasiënte se inligting op “los stukkies papier” neergeskryf word.
Die kaarte is glo reeds in Desember verlede jaar ontvang, maar gesondheidsgeriewe is nie van die aflewering hiervan in kennis gestel nie. Bestellings is glo ook nie opgevolg nie.
“Dit is sulke voorkombare nalatigheid wat die ministerie se naam skade berokken,” het hy gesê.
Shangula het ook sy kommer oor die trae implementering van kapitaalprojekte by die ministerie uitgespreek.
“Die huidige koers van 33% in dié finansiële jaar beïndruk my glad nie. Die meeste van ons fisieke geriewe is in 'n betreurenswaardige toestand van verval,” het hy gesê.
Met verwysing na die ministerie se ouditverslae het Shangula gesê MoHSS het vir drie agtereenvolgende boekjare gekwalifiseerde ouditverslae ontvang.
'n Gekwalifiseerde ouditverslag beteken inligting wat verskaf is, was beperk en die betrokke ministerie voldoen nie aan algemeen aanvaarde boekhoubeginsels nie.
Volgens Shangula beteken dit nie noodwendig fondse is verkeerd aangewend nie, maar is in die meeste gevalle die gevolg van swak rekordhouding.
“'n Gekwalifiseerde ouditverslag plaas die ministerie in 'n slegte lig en kan agterdog by die publiek wek oor moontlike onetiese gedrag wanneer niks hiervan eintlik gebeur het nie.”
Hy het 'n beroep op die uitvoerende direkteur van die ministerie gedoen om te verseker goeie boekhoupraktyke word deurgaans toegepas om in die toekoms skoon ouditverslae te verseker.
Die hepatitis E-uitbreking het gewys die ministerie van gesondheid en maatskaplike dienste (MoHSS) is nie op noodgevalle voorbereid nie.
Volgens dr. Kalumbi Shangula, minister van gesondheid en maatskaplike dienste, het dít tot die ministerie se onvermoë gelei om 'n voorbeeld as vertrekpunt te vestig.
“As sodanig kan ons nie vasstel of die hepatitis E-virus se oorsaak endogeen of eksogeen is nie, omdat ons stelsels nie reageer en sensitief genoeg is om daardie vraag te beantwoord nie.”
Hoewel vooruitgang gemaak is, is die feit dat die uitbreking voortduur en moontlik endemies in Namibië kan word, 'n wekroep tot aksie, het Shangula gemaan.
“Die sluimerende apatie van die publiek teenoor die siekte is vreesaanjaend.”
Verskeie klagtes van die publiek oor die ministerie se dienslewering is volgens Shangula nóg rede tot kommer.
“'n Gebrek aan empatie en onverskilligheid het professionaliteit vervang.”
Volgens hom sal meganismes ingestel word om “vrot appels” te ontbloot, wat dit sal moeilik maak om onder die “goeies” te skuil.
“Waarom moet toegewyde gesondheidslui se integriteit weens 'n onsigbare oortreder bevraagteken word?”
Die minister het gesê beperkte opleidingsgeleenthede in die land het veroorsaak dat baie studente in die buiteland opgelei is.
Met hul terugkeer het die gegradueerdes volgens die minister gesukkel om weens 'n gebrek aan noodsaaklike vaardighede ten volle in die Namibiese gesondheidstelsel geïntegreer te word.
In die lig hiervan het die kabinet 'n remediërende program onder die vaandel van MoHSS gevestig, wat ontwerp is om dié gaping te oorbrug.
Uitdagings met die program is dat dit volgens Shangula nie “op enige maniere gestruktureer” is nie.
“Dit is aan die betrokke departemente se vindingrykheid oorgelaat.”
Die probleem is vererger deur die groot aantal buitelandse gegradueerdes wat nog meer druk op die reeds oorlaaide gesondheidstelsel geplaas het.
In die lig hiervan het MoHSS, die Universiteit van Namibië (Unam) en die Raad vir Gesondheidsberoepe in Namibië (HPCNA) 'n taakspan vir die remediërende program saamgestel. Die doel van die taakspan is om die program in sy huidige vorm te ondersoek en voorstelle vir beter strukturering te maak.
Met verwysing na die verkryging, verspreiding en uitdeel van medisyne in die openbare gesondheidsbedryf sê Shangula dit is vol logistieke uitdagings.
Volgens hom is dit omdat daar te veel rolspelers in die verskaffingsketting is.
Dít kan egter oorkom word as elkeen sy deel doen, sê Shangula.
Hy het verwys na onlangse tekorte aan gesondheidskaarte by openbare gesondheidsgeriewe en dat pasiënte se inligting op “los stukkies papier” neergeskryf word.
Die kaarte is glo reeds in Desember verlede jaar ontvang, maar gesondheidsgeriewe is nie van die aflewering hiervan in kennis gestel nie. Bestellings is glo ook nie opgevolg nie.
“Dit is sulke voorkombare nalatigheid wat die ministerie se naam skade berokken,” het hy gesê.
Shangula het ook sy kommer oor die trae implementering van kapitaalprojekte by die ministerie uitgespreek.
“Die huidige koers van 33% in dié finansiële jaar beïndruk my glad nie. Die meeste van ons fisieke geriewe is in 'n betreurenswaardige toestand van verval,” het hy gesê.
Met verwysing na die ministerie se ouditverslae het Shangula gesê MoHSS het vir drie agtereenvolgende boekjare gekwalifiseerde ouditverslae ontvang.
'n Gekwalifiseerde ouditverslag beteken inligting wat verskaf is, was beperk en die betrokke ministerie voldoen nie aan algemeen aanvaarde boekhoubeginsels nie.
Volgens Shangula beteken dit nie noodwendig fondse is verkeerd aangewend nie, maar is in die meeste gevalle die gevolg van swak rekordhouding.
“'n Gekwalifiseerde ouditverslag plaas die ministerie in 'n slegte lig en kan agterdog by die publiek wek oor moontlike onetiese gedrag wanneer niks hiervan eintlik gebeur het nie.”
Hy het 'n beroep op die uitvoerende direkteur van die ministerie gedoen om te verseker goeie boekhoupraktyke word deurgaans toegepas om in die toekoms skoon ouditverslae te verseker.
Kommentaar
Republikein
Geen kommentaar is op hierdie artikel gelaat nie