'Ons wag nie vir virus om te verdwyn'

Leandrea Louw – Dit is nie nou die tyd om vinger te wys nie, maar eerder vir alle partye om saam te werk. “Die minister het ons opdrag gegee om met Erongo Corona Care (ECC) te vergader. Dit is 'n teken dat ons wil saamwerk. Ek is jammer oor wat in die verlede gebeur het, maar nou is nie die tyd om vinger te wys nie, dit is 'n tyd waarin ons almal moet saamkom.”

So het die adjunkminister van gesondheid, dr. Esther Muinjangue, tydens 'n ontmoeting die naweek aan die kus met verteenwoordigers van die ECC gesê.

Die ECC-inisiatief is in die lewe geroep om die regering in sy stryd teen die Covid-19-pandemie by te staan. Volgens die voorsitter, mnr. Heritha Muyoba, het die ECC reeds in Maart/April 'n voorlegging aan die minister van gesondheid en maatskaplike dienste (MoHSS) in terme van die streek se gereedheid sowel as 'n vooruitskatting van moontlike gevalle gestuur. Die doel was om te verseker 'n streekplan is gereed wanneer die pandemie die streek tref.

“Ons het die geleentheid gemis,” het hy erken.

Hy het gemaan Walvisbaai moet as 'n gevallestudie gebruik word om te verseker elke ander streek in die land trap nie in dieselfde strik nie. Die ECC voorspel Walvisbaai sal teen die einde van die maand 2 000 Covid-19-gevalle hê en die getal kan teen Augustus 6 000 bereik.

“Terwyl sekere kenners voorspel het dat ons net 210 gevalle teen Januarie aanstaande jaar sal hê, is ons reeds verby die 1 000-merk. Ons moes eerder te véél voorberei het. Dit moet werklik vir ons almal 'n les wees,” het hy gesê.

Vroeër vanjaar het die ECC 'n plan van aksie in werking gestel om 'n veldhospitaal met 150 beddens te bou, wat steeds goedkeuring vereis. Volgens MoHSS is goedkeuring egter wel gegee en is dit onbekend hoekom die streek se gesondheidsdirektoraat dit nie deurgegee het nie.

Muinjangue sê sedert die eerste Covid-19-gevalle in die land aangeteken is, was die regering op sy pos.

Sy het erken planne moes dalk veel vroeër reeds in werking gestel gewees het en die ministerie moes teen 'n vinniger pas beweeg het.

Minister Kalumbi Shangula het gister 68 nuwe Covid-19-gevalle in die land aangekondig. Hiervan is 60 in Walvisbaai, een in Swakopmund, ses in Windhoek en een in Keetmanshoop. Vyftig is mans en 18 vroue. Die ouderdomme wissel van ses tot 68 jaar. Dit bring die totaal op 1 843 gevalle vir die land.

Die geval in Keetmanshoop is 'n 31-jarige Suid-Afrikaanse vragmotorbestuurder van Durban wat die land via Ariamsvlei binnegekom het. Hy is op 21 Julie getoets en het die land die volgende dag verlaat.

Die gevalle in Windhoek is soos volg:

• 'n 68-jarige man wat in die Windhoek Sentrale Hospitaal opgeneem is waar hy 'n prosedure ondergaan het en ontslaan is. Hy het op 24 Julie by 'n private hospitaal aangemeld met Covid-19-verwante simptome en is in 'n ernstige toestand opgeneem.

• 'n 38-jarige polisiebeampte en 'n kontak van 'n bevestigde geval. Hy het geen simptome nie en was nie in kwarantyn nie.

• 'n 23-jarige vrou wat by 'n plaaslike bank werk. Sy het geen kontak met 'n bevestigde geval of enige onlangse reisgeskiedenis nie. Sy het wel 'n verjaarsdagpartytjie bygewoon waar 'n persoon was wat van die kus af gereis het. Sy was nie in kwarantyn nie.

• 'n 29-jarige vrou met geen onlangse reisgeskiedenis of kontak met 'n bevestigde geval nie. Sy het wel Covid-19-verwante simptome.

• 'n 26-jarige vrou wat in die Katutura-staatshospitaal opgeneem en op 24 Julie ontslaan is. Sy het die volgende dag met Covid-19-verwante simptome by 'n private hospitaal om hulp aangeklop. Sy is 'n kontak van 'n bevestigde geval.

• 'n 48-jarige man met simptome en 'n kontak van 'n bevestigde geval.

Volgens Shangula is die geval in die Hardapstreek wat Sondag aangekondig is, 'n driejarige en nie 'n dertienjarige soos vroeër aangekondig is nie. Die kind is getoets nadat die familie deur die pa besoek is wat uit Walvisbaai gereis het.

Shangula sê nog 26 mense het intussen ten volle herstel. Tot op hede is 23 140 weefselmonsters getoets en die land het nou 1 734 aktiewe gevalle.

- [email protected]