Ons taal - Lekker taalknope

Hoe lekker om hierdie week weer met ons liewe lesers ‘n geselsie aan te knoop.So gepraat van knoop, kom ons gesels oor sêgoed wat dié woord bevat. Die eerste een wat ek leer ken het, was reeds voor skool toe my ma ons verbied het om kougom te eet. Die afskrikmiddel: as jy dit insluk, kan jou derms knoop! Ja, ek weet dis nie waar nie, maar kougomkou steek my tot vandag dwars in die krop.Kom ons kuier weer saam met Anton Prinsloo in sy boek Annerlike Afrikaans om te sien waar die knope in kontreitaal lê. Hier is twee wat met hulle betekenis aan weerskante lê.Die mense van Winburg sê: “Aan die end van die riem lê die knoop” wat beteken dat die moeilikheid nog voor vir jou wag. In die Oos-Kaap sê hulle “daar is ‘n knoop in die voorslag” as daar fout is by die begin van die saak.Hierdie soort moeilikheid mag mens dalk net tot ‘n sopie sterk drank dryf, of soos hulle in Port Elizabeth sal sê: jy knoop die aap se stert.Wanneer mans (of vroue) te veel jok en in die proses in hulle leuens verstrik raak, kan ons sê hulle het hulle “in ‘n knoop vasgedraai”. Te veel van hierdie knope kan lei tot 'n uitdrukking deur die mense van Delmas: “Die knoop met die tong gemaak, wat die wet moet losmaak.” Dis nou ‘n egskeiding. Ernstige sake!Maar kom ons sluit af op ‘n ligter noot. Wanneer ‘n baie lang kêrel in Excelsior vir hom ‘n heelwat korter meisie kry, sê hulle “Hy sal ‘n knoop in sy rugstring moet maak.”Petronella F GenisVakgroep AfrikaansUniversiteit van Namibiëpfgenis@unam.na

Ons taal - Lekker taalknope

Kommentaar

Republikein 2025-05-02

Meld asseblief aan om kommentaar te lewer

Ons taal - Lekker taalknope

Kommentaar

Republikein 2025-05-02

Meld asseblief aan om kommentaar te lewer

MELD AAN

Advertensie