Ons Taal: Dronkpraatjies

Ek hoor vroeër die week statistiek van gemiddel hoeveel mense op enige gegewe oomblik oraloor die wêreld dronk is. En nee, nou nie daai lekker rondomtaliedraaidronk van ons kinderdae nie – dronk van te veel drank. Ek is nie ’n datummens nie, en ook nie ’n statistiekmens nie. So, die besonderhede van die statistiek het ek byna dadelik vergeet, maar die idee dat daar geen enkele sekonde sou bestaan waarin al die wêreld se mense gelyk nugter is nie, slaan my dronk! Geen wonder dat daar dan soveel idiome is wat na dronkenskap verwys nie. Hulle is aangeklam, hoog in die takke, hoenderkop en vuurwarm. Hulle het te diep in die bottel gekyk, die druiwekar gery, die elmboog gelig, van Noag se sap gedrink, die mannetjie met die kurkhoed, die langnek-kaatjie of vir Swart Griet gesoen. Soms word ’n oënskynlik onskuldige drankie die skuld gegee soos ’n sappie, melkie of watertjie, maar dan in besonder kromhoutsap, tiermelk en lawaaiwater! Of iemand se tee of kruie was te sterk. Dalk lê die skuld by ’n pad wat hulle geloop het, soos die pad deur die wingerd. Maar hoe dit ookal sy, as hulle eers op daardie stasie is, doen hulle snaakse goed. Hulle meet die pad en ja die ganse, bokke of skape aan terwyl die wêreld met hulle draai. Laat weet gerus as julle van nog ander weet!Petronella F Genis pfgenis@unam.na Vakgroep Afrikaans Universiteit van Namibië

Ons Taal: Dronkpraatjies

Kommentaar

Republikein 2025-07-23

Meld asseblief aan om kommentaar te lewer

Ons Taal: Dronkpraatjies

Kommentaar

Republikein 2025-07-23

Meld asseblief aan om kommentaar te lewer

MELD AAN

Advertensie