Ons taal

Gedurende die Desembervakansie se Kanaal 7-kusuitsendings het ek met die luisteraars gesels oor 'n paar idiome wat afkomstig is uit die Bybel. Ek het geweet daar behoort heelwat te wees, en het op eie stoom 'n hele paar ontrafel, maar dit was ook met stoomtreinmoeite. Ek het so gewens ek kon teen sneltreinspoed elke dag 'n wavrag uitdrukkings aanry, maar ongelukkig was daar nie 'n Bybelidiomeboek wat ek kon raadpleeg nie. Maar sowaar, ek het skaars weer my voet in Windhoek gesit, toe word my wens waar. 'n E-pos van die Suid-Afrikaanse Akademie van Wetenskap en Kuns het die nuus gebring – Met een voet in die Bybel – propvol Afrikaanse spreekwoorde, vaste uitdrukkings, idiome en gesegdes. 'n Volle 800 van hulle! Dis genoeg brandstof vir ‘n hele reeks taalpraatjies en rubrieke. Ds. Gert Janse van Rensburg bou in sy nuwe boek vir ons 'n nuwe kennisspoorlyn aan die hand van meer as 2 000 skrifgedeeltes wat ons ook hier en daar voer oor koppies van teologie en stroompies van humor. Hygend hert, ek moet dadelik vir my ene aanskaf! Het jy geweet hierdie uitdrukking kom uit die Nederlandse beryming van Psalm 42:1 ‘t Hijgend hert, de jacht ontkomen waar die digter sterk verlang na die nabyheid van God, soos ‘n wildsbok na water. Dat die bok uit 'n jagter se agtervolging ontsnap het, is die Nederlandse berymer se verbeeldingsvlug. Totius en T.T. Cloete het nie in die Afrikaanse teks sy voorbeeld gevolg nie, maar tog het iets van die skat in ons taal behoue gebly. En danksy Oom Gert weet ons nou hoe dit gebeur het. So, laat weet bietjie, wie wil saam met my op die wa spring om hierdie skitterende juweel van 'n boek aan te skaf?Petronella F Genis pfgenis@unam.na Vakgroep Afrikaans Universiteit van Namibië

Ons taal

Kommentaar

Republikein 2025-07-16

Meld asseblief aan om kommentaar te lewer

Ons taal

Kommentaar

Republikein 2025-07-16

Meld asseblief aan om kommentaar te lewer

MELD AAN

Advertensie